Somaliland: Madaxweyna Oo Magcaabay Agaasimaha Sirdoonka Qaranka

Waa Kuma Masuulka Loo Magcaabay Hay’adda Sirdoonka Qaranka?

Hargeysa (ANN)- Madaxweynaha Jamhuuriyadda Somaliland, Cabdiraxmaan Maxamed Cabdullaahi (Cirro), ayaa maanta magcaabay Agaasimaha Guud ee Hay’adda Sirdoonka Qaranka Jamhuuriyadda Somaliland.

Qoraal saxaafadeed kasoo baxay qasriga Madaxtooyadda Jamhuuriyadda Somaliland maanta oo ku taariikhdu tahay 25/12/2024, oo

warbaahinta lagu shaaciyay, ayaa lagu sheegay  in Madaxweynuhu xilkaa u magaacay Jaamac Maxamuud Cigaal Maxamed.

Sida lagu sheegay qoraal saxaafadeedka wareegto Madaxweyne oo summadeedu tahay JSL/XM/WM/222-014/122024 , wuxuu ku magacaabay Agaasimaha Guud ee Hay’adda Sirdoonka Qaranka Jamhuuriyadda Somaliland.

” Markii aan arkay: Qoddobka 90aad ee Dastuurka Jamhuuriyadda Somaliland;

Markii aan tixgeliyay: Ahmiyadda ay Hay’adda Sirdoonka Qaranku u leedahay Amniga Dalka Jamhuuriyadda Somaliland;

Markii aan ku qancay: Aqoontiisa, kartidiisa, iyo waayo-aragnimadiisaba, isla markaana uu hanan karo mas’uuliyadda ka dhalanaysa xilkan;

Markii aan sameeyey: La-tashi;

Waxa aan go’aamiyay;

In Jaamac Maxamuud Cigaal Maxamed laga bilaabo taariikhda maanta uu ahaado Agaasimaha Guud ee Hay’adda Sirdoonka Qaranka Jamhuuriyadda Somaliland.” ayaa lagu yidhi, Wareegtada Madaxweyne  Cabdiraxmaan Maxamed Cabdiullaahi (Cirro).

Dhinaca kale, Agaasimaha cusub ee loo magcaabay xilkan ayaa hore usoo qabtay Xilka Wasiirka Macdanta iyo Tamarta Somaliland, xilligii Xukuumaddii hore ee Madaxweyne Muuse Biixi Cabdi, isagoo ka mid ahaa saraakiishii sare ee Ciidamadda dawladdii Soomaaliya ee burburtay, isla markaana leh aqoon dhanka amniga iyo ciidamada.

Sidoo kale, Agaasime Jaamac Maxamuud Cigaal Maxamed, ayaa ah masuul aan magaciisu ku cusbayn saaxadda siyaasadda oo dadka aqoonta u lihi ku tilmaamaan masuul xilalka uu soo qabtay ku amaanan oo ay bulshadda inta aqoonta u lihi ku sifeeyaan mid ku addag go’aamadiisa si masuuliyad iyo ixtiraam leh, isagoo sidoo kale, soo maamulay shirkaddo ganacsi oo waaweyn oo gaar loo leeyahay iyo kuwo dawli ah.

Magcaabistiisa ayaa kusoo beegnatay xilli ay xukuumadda cusub ee Madaxweyne Cabdiraxmaan Cirro waajahayso duruufo iyo xaallado collaadeed  oo dhinacyo baddan oo ka alloosan qaybo ka mid ah deegaamada Somaliland iyo weliba collaado xilligan ka bilaabmay xadka dhinca Koonfurta Somaliland ee guddaha dalka Ethiopia ee deegaamada Hawdka oo dadka shacabka ee ka tirsan maamulka Soomaalida Ethiopia ee Jigjiga  oo asal ahaan kasoo jeeda isir ahaan Somaliland iyo ciidanka Booliska ee loo yaqaan Liyu Boolis, iyadoo dagaalka maalintii labaad ka dhacay deegaanka Dacawalay ee guddaha.