Ergay Ka Socday Xisbiga Talada Haya Ee Djibouti Oo Ku Tilmaamay Xisbiga KULMIYE Mid Dumuqraadiyada Iyo Tanaasulka Ka Muuqda Afrika Ku Cusub Yihiin

Boorama(ANN)-Madaxweynaha Jamhuuriyadda Somaliland, isla markaana ah guddoomiyaha xisbiga KULMIYE,  Mudane Muuse Biixi Cabdi, ayaa si rasmi ah  u daah-furay shirka lixaad ee golaha dhexe ee xisbiga KULMIYE.

Shirka golaha dhexe ee xisbiga KULMIYE, oo maanta ka furmay magaalada Boorama ee xarunta gobolka Awdal, waxa kale oo ka qaybgalay  Madaxweyne-ku-xigeenka, ahna guddoomiye-ku-xigeenka Afraad ee xisbiga KULMIYE, Mudane Cabdiraxmaan Cabdilaahi Ismaaciil (Saylici), shir-guddoonka golaha wakiillada Somaliland, hoggaanka sare ee xisbiga KULMIYE.

Sidoo kale, waxa shirk aka qaybgalay wufuud  caalami ah oo ka kala socota dalalka Turkiga, Djibouti iyo Ethiopia, xubno ka socda axsaabta mucaaridka, ergooyin xubnaha golaha dhexe ee xisbiga KULMIYE oo ka kala yimi gobollada iyo degmooyinka dalka, salaadiin iyo marti-sharaf kale.

Madasha waxa laga jeediyey hadallo ku saabsan Dimuqraaddiyadda xisbiga KULMIYE iyo horumarka uu Jamhuuriyadda Somaliland gaadhsiiyey muddadii ay xilalka qaranka u kala dambeeyeen hoggaankiisu.

Xubno isugu jira siyaasiyiin, madax-dhaqameed iyo haldoor kale oo madasha ku sugnaa oo hadallo ka jeediyey shirka golaha dhexe ee xisbiga KULMIYE, ayaa si weyn u ammaanay  Dimuqraaddiyada iyo furfurnaanta ka muuqata xisbiga KULMIYE, waxana ay hoggaankiisa ku ammaaneen sida ay u ilaalinayaan inaanay marnaba muddo-dhaafin shirarka xisbigu.

Guddoomiye-ku-xigeenka golaha dhexe, ahna ku-simaha guddoomiyaha, xildhibaan Jaamac Warfaa oo ugu horrayn madasha ka hadlay, ayaa si kooban u sharraxay guulihii uu gaadhay xisbiga KULMIYE iyo  sida ay xisbi ahaan u ilaaliyaan inay shirarka xisbiga ee kala duwani ku qabsoomaan xilliyadooda.

Xuseen Idiris Guuleed oo kamid ah golaha fulinta ee xisbiga talada dalka Djibouti haya ee RPP oo ugu horrayn madasha ka hadlay, ayaa hoosta ka xarriiqay in xisbiga KULMIYE, mudan yahay in duruus  dhina a Dimuqraaddiyadda ah laga barto, isla markaana furfurnaanta iyo isu tanaasulka ka muuqdaa yahay wax ku cusub qaaradda Afrika.

Murrashaxii jagada madaxweyne-ku-xigeen ee xisbiga UCID, Mudane Axmed Cabdi Muuse (Abyan) oo kamid ahaa marti-sharaftii shirka lagu casuumay, ayaa dhinaciisa hoggaanka xisbiga KULMIYE ku bogaadiyey sida ay isugu xidhan yihiin xisbiga iyo xukuumaddu, taas oo uu ku tilmaamay inay fure u tahay  horumarka xukuumadda.

 Suldaan Ibraahim Jaamac Samatar iyo Suldaan Cabdiraxmaan Jaamac Dhawal oo kamid ah madax-dhaqameedka ugu miisaanka culus ee gobolka Awdal, ayaa si isku mid ah u hambalyeeyey guulaha taariikhiga ah ee ay dalka gaadhsiiyeen xukuumadihii kala dambeeyey ee xisbiga KULMIYE kasoo baxay, waxana ay sheegeen inay madax-dhaqameed ahaan diyaar u yihiin la shaqaynta xukuumadda iyo xisbigaba.