Araweelo News Network
Wasiir dowlle Burci Max’med Xamzi oo katirsanaa xubanaha golaha wasiirada, isla markaana ahaa xildhibaan katirsan baarlamaanka DF-ka ayaa lagu dilay weerrarkii shalay sida uu xaqiijiyay Cabdi Salaam Hadliye wasiirka arrimaha dibadda DF-ka.
Dhinaca kale Raysal Wasaaraha Xukuumadda Somalia Omar Abdirashiid oo ka hadlay weerrarkaa, ayaa yidhi,“Waxaan tacsi tiiraanyo leh u dirayaa ehelada iyo qaraabadii muwadiintii Soomaaliyeed ee lagu xasuuqay badhtamaha Muqdisho. Si gaar ah waxaan tacsi ugu dirayaa ehellada Wasiiru dawlihii Bii’ada ee Xafiiskeyga oo weerarkaasi naftiisa ku waayeey. Falkaas argagixiso wuxuu ahaa mid banii’aadamnimada ka baxsan oo ay gaysteen kuwo arxan daran oo ka soo horjeeda nolosha iyo horumarka ummada Soomaaliyeed,” Ayuu yidhi, Raysal Wasaaruhu.
Omar Abdirashiid, wuxuu sheegay in falkan ismiidaamintaa ee lala beegsadey Hotel Naasa-Hablood1 aanu hakin doonin habsami u socodka hawlaha dawladda iyo hannaanka loogu diyaar garoobayo dalka in ay ka qabsoomaan doorashooyin.
“Anoo aad uga murugaysan dhibka loo gaystay dadka rayidka ah waxaan ummadda u xaqiijinayaa in falkaas argagixiso aanu hakin doonin shaqadii aan u haynay dadkeena iyo dalkeena. Waxaana shacab weynaha u sheegayaa inaan u taaganahay difaacooda xili kasta aana xoojinayno amniga guud ahaan,” Ayuu yidhi Raysal Wasaare Omar Abdirashiid.
Raysal Wasaaraha ayaa muujiyay inuusan jirin dambi ummada Soomaaliyeed laga galo oo ka weyn gumaadka lagu hayo dadka rayidka ah ee aysan jirin wax ay galabsadeen iyo cid ay dambi ka galeen xili lagu guda jiro bisha Ramadaan.
Dhinaca kale wararka qaar ayaa sheegaya in saraakiil sarsare dowladda Federaalka Soomaaliya lagu dilay weerrarkii Naasa-hablood, wakaaladaha wararka reergalbeedka iyo Telefishanka Aljazeera ayaa xalay baahiyay in mas’uuliyiin lagu dilay weerarkii Hoteel Naasa-hablood oo ay sheegatay Xarakada Al-shabaab.