Araweelo News Network

Tel Aviv (ANN)- Ra’iisal-wasaaraha Israa’iil Mr. Benjamin Netanyahu, ayaa la sheegay inuu waajahayo baadhis dambi oo ah wax is daba marin iyo inuu qaatay laaluush, kadib markii ciidanka booliska Yuhuuddu heleen dukumanti cusub oo ay ka buuxaan eedaymo ka dhan ah Ra’iisal-wasaaraha.
Sida lagu baahiyey wargeyska Haartz ee ka soo baxa Israa’iil oo Jamhuuriya soo xigtay, Xeer-ilaaliyaha Guud ee Yuhuudda Mr. Avichai Mandelblit, ayaa oggolaaday in hay’adaha dambi-baadhistu si rasmi ah u bilaabaan baadhista eedaymaha loo haysto Ra’iisal-wasaare Netanyahu, kuwaasoo ay ka mid yihiin inuu lacag laaluush ah oo dhan $1,039,704 (hal milyan, soddon iyo sagaal kun, toddoba boqol iyo afar doollar) uu ka qaatay ganacsade u dhashay dalka Faransiiska oo magaciisa la yidhaa Arnaud Mimran.
Hase yeeshee, afhayeen u hadlay Ra’iisal-wasaaraha Israa’iil ayaa eedaymahaas ku tilmaamay waxba kama jiraan, waxaannu yidhi; “Waa wax aan waxba ka jirin, waxana lagu ceebaynayaa Ra’iisal-wasaaraha iyo qoyskiisa.”
Dambi-baadhayaasha, ayaa iyaguna ku doodaya inay hayaan caddaymo muujinaya khaladaad uu sameeyey Ra’iisal-wasaaruhu markii lagu jiray ololaha doorashadii u ka qabsoontay Israa’iil sannadkii 2009-kii, waqtigaas oo ay dhaceen waxyaabo badan oo madmadaw ah.
Waxa kaloo la ogaaday in ganacsadaha Faransiiska oo musuqmaasuq cashuuro lunsi ah lagu helay, laguna xukumay hadda uu laaluush ahaan lacago badan u siiyey Ra’iisal-wasaaraha Yuhuudda.
Dhinaca kale, Mr. Netanyahu ayaa qirtay inuu lacag dhan $40 kun doollar oo qaadhaan ah uu sifo sharci ah uga qaatay ganacsadaha u dhashay Faransiiska, balse waxa uu dafiray lacagaha kale ee lagu eedaynayo, waxana la caddeeyey in baadhista kiiska Ra’iisal-wasaaruhu si rasmi ah ayuu bilaabmay, waxaanna la filayaa in dambi-baadhayaal ka socda Boolisku ay su’aalo weydiiyaan maalmaha soo socda.