Weftigii Madaxweynaha Somaliland Oo Dalka Kusoo Laabtay, Kana Hadlay Natiijada Socdaalkoodii Ethiopia

Hargeysa(ANN)-Madaxweynaha Jamhuuriyadda Somaliland, Mudane Muuse Biixi Cabdi iyo weftigii uu hoggaaminayey oo booqasho laba maalmood qaadatay ugu maqnaa dalka Ethiopia, ayaa maanta kusoo guryo noqday caasimadda Somaliland ee Hargeysa.

 Madaxweyne Muuse Biixi iyo weftiga uu hoggaaminayo, ayaa markii ay soo cago-dhigteen gegida caalamiga ah ee Cigaal International Airport, waxa safarkooda saxaafadda uga warbixiyey wasiirka wasaaradda arrimaha gudaha Jamhuuriyadda Somaliland, Mudane Maxamed Kaahin Axmed, waxana uu shaaciyey in wada-hadal midho dhal ah oo guul laga gaadhay uu dhexmaray madaxweynaha Jamhuuriyadda Somaliland  iyo Ra’iisal wasaaraha Ethiopia

“Weftigu waxa uu la kulmay ra’iisal wasaaraha dalka Itoobiya, Dr. Abiy Axmed oo ay weheliyaan wasiirrada Khaarajiga, maaliyadda, wasiiru-dawlaha arrimaha dibadda iyo saraakiil sarsare oo dalka Itoobiya ka tirsan. wada-hadal is-fahan dheer leh, ayaa madaxweynaha iyo ra’iisal wasaaraha  iyo madaxda labada dalba dhexmaray.” ayuu yidhi, Wasiirka Arrimaha Gudaha Somaliland.

Mar uu ka hadlayay waxyaabaha ay sida gaarka ah uga wada-hadleen weftiga uu madaxweynaha Somaliland hoggaaminayo iyo Ra’iisal wasaaraha dawladda Federaalka Ethiopia Dr. Abiy Axmed, wuxuu yidhi, “Waxannu ka wada-hadalnay sii xoojinta iyo adkaynta xidhiidhka iyo is-kaashiga muddada dheer usoo socday dalalka Somaliland iyo Itoobiya ee xagga ganacsiga, nabadgelyada iyo arrimaha siyaasadda intaba, waxana aanu ka wada-hadalnay sidii Somaliland iyo Itoobiya ay uga wada-shaqayn lahaayeen qalalaasaha iyo mashaakillada ka taagan guud ahaanba Geeska Afrika  iyo sidii loosii ambo qaadi lahaa wada-hadalkii muddada hakaday ee is aragyada doorka ahna laga galay ee Somaliland iyo Soomaaliya, arrimahaasna si wanaagsan baanu isula lafo-gurnay, si wanaagsanna waa la isula fahmay,” ayuu yidhi Maxamed Kaahin Axmed.

Wasiirku waxa uu si weyn uga mahadnaqay habkii maamuuska sarreeyey ee ra’iisal wasaaraha dalka Itoobiya iyo guud ahaanba saraakiisha sarsare ee xukuumadda uu hoggaamiyaa usoo dhaweeyeen madaxweynaha Jamhuuriyadda Somaliland, Mudane Muuse Biixi Cabdi iyo weftiga uu hoggaaminayo.