Araweelo News News
Dr. Sacad oo ka jawaabayey su’aal weriye Maxamuud Walaaleye ka weydiiyey warar warbaahinta qaarkood ku sheegeen inaan dawlada Ingiriisku qaabilin Madaxweyne Siilanyo, isagoo ku sugan London ayaa yidhi,
“Ma jirin kulamo uga qorshaysnaa Madaxweyne Siilanyo inuu la qaato madaxda Ingiriiska, mana jirin martiqaad uu ka dalbaday, wuxuu u yimi inuu dadkiisa la kulmo, kuna nasto.
Wasiirka Arrimaha Dibedda Dr. Sacad Cali Shire ayaa hadalkiisa raaciyey, “Markii ugu horeyseyna maaha ee madaxweynuhu sidan oo kale ku yimaado London. Madaxweynayaashu waxay leeyihiin fasax iyo nasasho. Madaxweynuhu dadkiisana wuu arkay fasax nasashana wuu ku qaatay.
Dhinaca kale, Wasiirka Arrimaha Dibedda Dr. Sacad Cali Shire ayaa caawa ka qeybgeli doona kulan loogu magac-daray Ku-Baraaruga Kheyraadka Somaliland oo wada-xaajood iyo su’aalo lagu weydiin doono, soona qabanqaabiyeen xirfadlayaasha Somaliland, sida lagu baahiyey eventbrite.co.uk.
Kulanka oo wakhtiga fiidnimada ka dhici doona Oxford House, London ayaa lagu sheegay in Ardayda reer Somaliland iyo xirfadlayaashu ka heli doonaan fursad ay ku weydiiyaan Wasiir Sacad arrimaha bulshada iyo siyaasada, si gaar ahna diirada loogu saari doono maalgashiga dibadeed, aqoonsiga iyo siyaasadaha Geeska Africa, siyaasada Arrimaha Dibedda Somaliland, iyo kaalinta qurbajoogu ka qaadan karaan.
Madasha habeen dambe ayaa la filayaa inay ka soo baxdo talooyin ku aadan kaalinta lagu horumarin karo dhaqaalaha Somaliland, loona abuuri karo shaqooyin dhalinyarada waxbaratay ee dalka joogta.
