Araweelo News Network

Hargeysa(ANN)-Wasiirka Arrimaha Dibadda Jamhuuriyadda Somaliland Sacad Cali Shire, ayaa sheegay in aanu jirin wax Heshiis ah oo la xidhiidha Saldhigga Millatari oo Madaxweyne Siilaanyo horgeeyay fadhigii labada gole ee Guurtida iyo Wakiilladu ku yeesheen Hargeysa bishii la soo dhaafay ee February 2017.

sidoo kale, wuxuu ka hadlay aragtidiisa la xidhiidha mudahaharaadkii lagaga soo horjeeday saldhigga Berbera oo laga hor sameeyey safaaradda Imaaraadka Carabtu ku leeyahay magaalada London ee dalka Ingiriiska maalintii Khamiista.

Wasiirka Arrimaha Dibadda Md. Sacad Cali Shire oo waraysi siiyey telefishanka Saab TV shalay, kana jawaabayey su’aal laga weydiiyey sida uu u arko mudaharaadkii lagaga soo horjeeday saldhigga millatari ee ka dhacay Ingiriiska, waxa uu caddeeyey in muwaaddiniinta reer Somaliland xaq u leeyihiin inay cabbiraan dareenkooda.

“Qofka muwaaddinka ah wixii uu xaq u leeyahay inuu sameeyo cidna u diidi mayso, laakiin wax walba nidaam ayey leeyihiin, wax walbana waxa fiican in loo meel dayo oo laga fekaro marka hore, muxuu faa’iido keeni karaa, muxuuse khasaare keeni karaa? Waayo taas ayaa wanaagsan in la miisaamo, iyadana lafteedana waxa muwaaddinku leeyahay meelo badan iyo Albaabo badan oo uu ku cabbiri karo dareenka iyo fikirkiisa,” ayuu yidhi Wasiirka Khaarajiga Somaliland.

Waxa kaloo uu sheegay in Madaxweyne Axmed Siilaanyo aannu wax Heshiis ah oo khuseeya saldhigga Millatari ee Imaaraadka Carabta horgayn fadhigii labada gole ee Guurtida iyo Wakiilladu ku yeesheen Hargeysa bishii la soo dhaafay ee February 2017.

“Madaxweynuhu codsi ayuu geeyey Baarlamaanka (Guurtida iyo Wakiillada) ee Heshiis ma gayn. Waxa Madaxweynuhu geeyey codsi iyo qodobadda la doonayo inay ku jiraan heshiiska ee lagala hadlayo cidda ina soo weydiisatay saldhigga oo ah dawladda Imaaraadka, wadahadalkiina weli muu bilaabmin,” ayuu yidhi Dr Sacad Cali Shire.