Caddaado-Gal-mudug(ANN)-Bulshada ku dhaqan deegaanka Caddaado ee Maamul goboleedka Soomaaliya ee Galmudug, ayaa ku dareeray inay ugaadhsadaan Ayaxa oo ku habsaday deegaanka, kuwaas oo aan u baahnayn in laga buufiyo.
Dadka Deegaanka, ayaa bilaabay Ugaadhsiga Ayaxa oo noqday mid la kala boobayo, isla markaana la cunayo, taas oo abuurtay xamaasad aan hore looga arag geyiga Soomaalida oo inta badan ka qayliya marka ay arkaan Ayaxa, balse deegaanka Caddaado, wuxuu Ayaxu noqday Luws Ilaahay usoo daadiyay, waxaana shaaracyada Magaalada Caddaado lagu shiilayaa Ayaxa oo la dubayo kadibna la cunayo.
Deegaamada geyiga Soomaalida ayaan la arki jirin Ayaxa, iyadoo dhinaca dalalka Carabta iyo meelo kale oo dunida ah looga yaqaan Laws Ilaahay soo daadiyay, isla markaana aad looga isticmaalo cunistiisa oo la rumaysanyahay inuu leeyahay faa’idooyin nafaqo iyo Fiitamiino, waxayna dadka deegaanka Caddaado xilligan Ayaxa u isticmaalayaan sida Khudrada iyagoo ku cunaya Bariiska iyo Baastada, iyadoo la shiilayo.
Deegaamo baddan oo ka mid ah dhulka Soomaalidu degto ayuu ku habsaday Ayaxu waxaana kasoo yeedhaya qaylo dhaan ay ku dalbanayaan in laga caawiyo sidii looga buufin lahaa, balse deegaanka Caddaado iyo dadkeedu uma baahna gurmad lagula tacaalo Ayaxa iyo sidii looga buufin lahaa, waxayna quuteen Ayaxa oo suuqiisu xaami noqday, isla markaana la kala iibsanayo.