Araweelo News Network
Jilib – Soomaaliya (ANN)- Kooxda Al-shabaab ayaa ku hanjabay inay dagaal adag kala hortagi doonaan dawladda madaxweynaha cusub ee loo doortay Soomaaliya Mr. Maxamed Cabdillaahi Farmaajo.
Al-shabaab ayaa boqollaal dagaalyahannadooda ka mid ah ku soo bandhigay degmada Jilib ee Gobolka Jubbada Dhexe.
Xoogag tiradoodu gaadhayso 800 dagaalyahan cusub ka tirsan Al-shabaab oo dhammaystay tababar ciidan ayaa dhoolla-tus millatari oo culus ku sameeyey fagaare ku yaal degmada Jilib ee koonfurta Soomaaliya.
Dhoolla-tuska xoogagga cusub ee Al-shabaab ku sameeyeen magaalada Jilib waxa ka qaybgalay boqollaal shacabka degaankaas iyo sidoo kale saraakiil sare oo ka tirsan kooxdaas.
Masuuliyiinta ka qaybgalay bandhigga dagaalyahannada cusub waxa ka mid ah Hoggaamiyaha Guud ee Al-shabaab iyo guddoomiyaha u qaabilsan gobollada Jubbooyinka.
Saraakiisha Al-shabaab oo fagaarahaas ka hadlay, ayaa caddeeyey inay xoogaggan tababarka loo xidhay u diyaareen in ay dagaal adag la galaan dawladda cusub ee uu madaxweynaha ka yahay Maxamed Cabdillaahi Farmaajo oo dhowaan lagu doortay magaalada Muqdisho.
Sidoo kale, waxay ku hanjabeen inay weerarro culus la beegsan doonaan xarumaha dawladda taagta daran ee uu soo dhisi doono Farmaajo oo ay ku eedeeyeen inuu wato fikirka dawladaha shisheeye iyo wax ay ugu yeedheen gaalada ku soo duulay waddanka Soomaaliya ee colaaduhu naafeeyeen.