Araweelo News Network
Mogadishu(ANN)-Madaxweynaha Maraykanka Donland Trump, ayaa ka dhabeeyay go’aankiisii ahaa inuu masaafurinayo kumanaan qoxooti sharci la’aan ku jooga dalka Maraykanka, waxaana dafcadii u horaysay oo Soomaali ah oo lagasoo tarxiilay ay soo gaadheen magaalada Muqdisho.
Garoonka diyaaradaha magaalada Muqdisho, ayaa lagasoo dajiyay xalay ku dhawaad 100 qof oo Soomaali ah, kuwaas oo dalka Mareykanka lagasoo masaafuriyay.
Dadkaa oo markii hore lagasoo dajiyay garoonka diyaaradaha Joma Kenyatta ee magaalada Nairobi, ayaa lagu daadiyay magaalada caasimadda ah ee Muqdisho, iyadoo diif badani ka muuqato, waxayna qaar ka mid ah oo warbaahinta la hadlay ka sheekeeyeen dhibaatadii ay lasoo kulmeen intii ay ku sugnaayeen xabsiyada dalkaa iyo laamaha socdaalka Mareykanka.
Go’aanka lagu soo masaafuriyay dadkaa, ayaa ah mid Madaxweynaha cusub ee Maraykanka Donald Trump hore u ballan qaaday, isagoo xiligii ololaha kaanbaynka balanqaaday in muslimiinta soo galootiga ah uu ka Eryayo wadankiisa.