Guddoomiyaha WADDANI, oo ka hadlay Mawqifka Labada Xisbi iyo Soo celinta Komishankiii Hore ee Doorashooyinka.
Hargeysa(ANN)-Labada Xisbi ee Mucaaradka Somaliland, ayaa ka hadlay mawqifkooda soo jeedinta gudddiga dhex-dhexaadinta ee ku dhex jiray sidii xal loogu heli lahaa khilaafka xukuumadda iyo xisbiyada mucaraadka, kuwaas oo shalay shaaciyay saddex qodob oo soo jeedin ah oo ay u arkeen inay xal u noqon karaan khilaafka.
Guddoomiyaha Xisbiga Mucaaradka ee WADDANi, Cabdiraxmaan Maxamed Cabdullaahi Cirro, oo u hadlay labada Xisbi ee WADDANI iyo UCID, ayaa maanta warbaahinta kula hadlay xarunta Xisbiga UCID, ee magaalada Hargeysa, ayaa sheegay inay soo dhowaynayaan soo jeedinta guddiga dhex-dhexaadinta oo uu sheegay in maadaama ay kalsooni buuxda siiyeen labada Xisbi ee UCID iyo WADDANI, ay dhankooda aqbalayaan wixii ay soo jeediyeen.
Guddoomiyaha Xisbiga Mucaaradka ee WADDANI, Cabdiraxmaan Cirro, oo ka hadlayay mawqifkooda labada Xisbi, wuxuu yidhi, “waxa nasoo gaadhay shalay 16 Desember 2019, qoraal kasoo baxay guddiga dhex-dhexaadinta, markaanu eegnay xaalada guud ee dalku marayo.
markaanu ka gun-gaadhnay in aanay jirin xukuumad u maqan dalka iyo dadka oo danaynaysa midnimada, wada-jirka iyo jiritaanka Umadda.
markaanu aragnay in aanay xukuumaddu diyaar u ahayn qabsoomida doorashooyin sharci ah.
Markaanu aragnay baahida ay Bulshada Somaliland u qabaan qabsoomida doorashooyinka golayaasha, markaanu tixgelinay sidii dhaqanka iyo caadada ahayd Somaliland in la aqbalo go’aamada guddiyada dhex-dhexaadinta.” ayuu yidhi, Gudoomiye Cirro oo sheegay inuu ku hadlayo afka labada Xisbi.
Guddoomiyaha, Xisbiga WADDANI, Cabdiraxmaan Cirro oo ka hadlaya aqbalaada go’aamada ay soo jeediyeen Gudddiga dhex-dhexaadinta iyo mawqifka soo celinta Komishankii hore, wuxuu yidhi, “Waxay Labada Xisbi mucaarad go’aansadeen in ay aqbalaan dhammaan go’aamadii kasoo baxay, guddiga dhex-dhexaadinta, Xisbiyada muraadka, Madaxweynaha iyo Xisbigiisa, anagoo eegayna danta guud ee qaranka, midnimada Umadda iyo geedi-socodka dumuqraadiyada, waxaanu meesha ka saaray tabashadii aanu ka qabnay Komishankii hore ee doorashooyinka, haddaanu nahay Xisbiga WADDANI.”
Waxa uu sheegay inay guddiga dhex-dhexaadinta uga mahad-celinayaan hawshaa, isagoo yidhi, “Labada Xisbi mucaarad ee WADDANI, iyo UCID, waxay uga mahad celinayaan guddiga dhex-dhexaadinta hawshaa, waxaana ka xunahay xukuumadda iyo Xisbigeedu sida ay ula meeraysteen, waanuna Umadda u sheegaynaa in aanaan anagu la meeraysanayn Umadda ee aanu aqbalay go’aamadaa.” ayuu guddoomiyaha WADDANI, wuxuuna ka gaabsaday in weriyayaashu su’aalo ka weydiiyaan go’aamada ay aqbaleen ee guddiga dhex-dhexaadintu shalay shaaciyeen.