Araweelo News Network
Wasiir Warancadde oo warbaahinta kula hadlay xafiiskiisa magaalada Hargeysa shalay, waxa uu meesha ka saaray sharcinimada maayar cusub oo koox xildhibaanno ah doorteen Sabtidii, waxaannu sheegay in Burco leedahay hal maayar oo ah kii hore ee sharciga ahaa.
“Dawladaha hoose waxay hoos yimaaddaan Wasaaradda Arrimaha Gudaha, sharci baana inoo yaal, markaa sharcigaa ayuun baa loo maraa haddii shaqada la isku garanwaayo, waxa lagu ridaa ama soo jeedin kara in maayarka la beddelo aqlabiyadda (xildhibaannada), kadibna waxa loo keenaa badhasaabka oo isaguna aniga ii keena, dabadeedna sharciga ayaannu waafajinnaa, balse arrintan aannu ka maqalnay telefishannada ee ah laba maayar bay leedahay Burco. Horta bulshada reer Somaliland waxaan u caddaynayaa Burco laba maayar ma laha, waddankeenuna wuu dhaafay waqtigii dadka qaarkii waxay doonaan iska odhan jireen. Burco waxay leedahay maayar keliya, sharci baana lagu doortay, si sharci ah baanu kaga tagi karaa,” ayuu yidhi Warancadde.
Waxa kaloo sheegay in aan looga fadhiyin xildhibaannada dadku soo doorteen inay ku kacaan wax ka soo horjeeda sharciga dalka u yaal, balse looga baahan yahay inay gutaan shaqada loo doortay oo ah waxqabadka iyo horumarinta bulshada iyo degaannadooda.
“Golaha Degaanka loogama baahna inay ku kacaan waxaan sharci ahayn, waayo waa dad madax ah, waxa loo doortay mustaqbalka iyo horumarka deegaanka inay ka shaqeeyaan, is-qabqabsi aan macno lahayn oo dadkana khalkhalgaliya inay ka soo baxaan maaha.”
“Wixii khilaaf ah ee jira annagaa dawladda u qaabilsan oo dhammaynayna, waxaanan u diri doonaa Wasiir-ku-xigeenkayga, wax kalena ma jiraan ee Burco waxay leedahay maayarkii hore ee sharciga ahaa Maayar Muraad,” ayuu hadalkiisa ku soo ururiyey Wasiirka Daakhiliga Somaliland.
