Araweelo_News_Network

Hargeisa (ANN)-Wasiirka Wasaaradda Maaliyadda iyo Horumarinta Dhaqallaha Jamhuuriyadda Somaliland  Md. Cabdillaahi Xasan Aadan oo uu weheliyo Agaasimaha Guud ee Wasaaradda Maxamed Xasan Saleebaan ayaa kulan albaabada loo xidhay kula yeeshay xafiiskiisa Madaxa Xafiiska Dawladda Ingiriiska ee Somaliland u fadhiya Mr. Ilyas Malek iyo Ku-xigeenkiisa ahna Madaxa Xafiiska Mashaariicda haweenayda lagu magcaabo Mss. Tatiana Feranandes.

Lama ogga Arrimaha ay ka wada hadlaan, balse wararka la xidhiidha kulanka ayaa sheegaya in Wasiirka Maaliyadda Somalilamd Cabdillaahi la wadaagay madaxda Xafiiska Dawladda Britain’ sida ay u fuleen Mashaariicda Dawladda Ingiriisku qaybta ka tahay ee Sanduuqa Horumarinta Somaliland ee SDF2, kuwaas oo ah wejigii labaad, isla markaana xiligan dhamaad ah.

Warka ayaa intaa ku daray masuuliyiinta wasaaraddu kula wadaageem masuuliyiinta socday Britain ugu sheegeen  in mashaariicda hore ay ahaayeen qaar wax-ku-ool ah, is la markaana wax weyn kusoo kordhiyay guud ahaan Dalka, gaar ahaan deegaamadii laga fuliyay.

Qaar ka mid ah mashaariicda laga maalgalinayay Sanduuqa wajigaa hore qaybaha Horrumarinta Biyaha, Wax-soo-saarka Beeraha iyo Xoollaha, Dhismaha Dakadda Maydh iyo weliba Jidadka iyo kuwo kale.

Kulanka oo socday saacaddo baddan, waxa ka mid ahaa go’aamadii la is kula qaatay in Sanduuqa Horrumarinta Somaliland (SDF) wajigiisa saddexaad ee bilaabmi doona dhawaan la soo dadejiyo si loo daboolo baahida ku-talo-galka kharash ee mashaariicda qorshaysan loo qoondeeyey.

Kulanka ayaa gunaanadkii labada dhinac hoosta ka xariiqeen muhiimada ay leedahay joogtaynta xidhiidhka iyo xoojinta wada shaqayn ay yeeshaan Wasaaradda Maaliyadda iyo Xafiiska Dawladda Ingiriiska ee Hargeisa.