Araweelo News Network
Hargeysa (ANN)- Mudanayaasha Golaha Wakiillada Jamhuuriyadda Somaliland, ayaa si duuduub ah ku ansixiyey miisaaniyadda qaranka ee sannadkan 2017, kadib markii xildhibaannada goluhu horjoogsadeen in dood laga yeesho miisaaniyadda.
Guddoomiyaha Wakiillada Md. Cabdiraxmaan Maxamed Cabdillaahi (Cirro) oo fadhiga golaha shirguddoominayey, ayaa mudanayaasha u soo bandhigay inay u kala coddeeyaan laba figradood oo khuseeya miisaaniyadda loo soo gudbiyey golahooda 26 December 2016, labadaas oo kala ah;
• In aan laga doodi karin miisaaniyadda oo duuduub lagu ansixiyo
• Iyo ra’yi kale oo ah in laga doodo miisaaniyadda.
“Golaha waxa fadhiya 66 mudane, waxa ay 25 mudane taageereen soo jeedinta ah in laga doodo miisaaniyadda, halka ay 36 mudane taageereen soo jeedinta ah in duuduub lagu ansixiyo miisaaniyadda 2017, waxaanna ansaxday in duuduub lagu ansixiyo.” Sidaa waxa yidhi Guddoomiye Cirro oo mudanayaasha u sheegay natiijada ka soo baxday codka loo qaaday labada fikradood ee miiska yaallay.
Kadibna, waxa mudanayaasha Golaha Wakiillada oo ay fadhiyeen 66 mudane ay cod gacan taag ah ku meelmariyeen Odoroska Miisaaniyad-sannadeedka qaranka Somaliland ee lagu shaqayn doono sannadkan bilawga ah ee 2017 oo xaddigeedu dhan yahay 2,175,104,355,662 oo shillin Somaliland ah, una dhiganta $362,517,393 (saddex boqol, lixdan iyo laba milyan, shan boqol, toddoba iyo toban kun, saddex boqol, sagaashan iyo saddex) doollar, taasoo lagu daray dhaqaalaha ku baxaya doorashada Madaxtooyada ee muddaysan 28 March 2017 oo gaadhaya ilaa $9 milyan oo doollar.
