Araweelo News Network
Hargeysa(ANN)-Boqolaal kun oo muwaadiniinta isu diiwaan geliyay doorashadda Madaxtooyadda Somaliland, ayaa u dareeraya goobaha codbixinta si ay codkooda u dhiibtaan wax ka yar saddex saacadood iyo badh xiliga bariga Afrika, ayaa ka hadhay in la furo goobaha.
Komishanka Doorashooyinka, ayaa sheegay goor sii horraysay in dhammaan qalabkii iyo sanaaduuqdii ay gaadheen in ka baddan 1600 goob doorasho oo dalka oo dhan ah oo lagu daabulay agabkii doorashadda, iyadoo hawlwadeenada Komishanka iyo muraaqibiinta axsaabtu u kala baxeen goobaha ay ku qornaayeen iyo gobolada dalka oo dhan.
Murrashaxiinta ku tartamaya doorashadda ee saddexda Xisbi KULMIYE, WADDANI iyo UCID, ayaa horre usoo gebagebeeyay Ololaha doorashadda ee soo socday todobaadyadii u danbeeyay, waxaana hada kaabiga saaran xumada doorashada markii ay xamaasadii kaanbaynku soo dhammaatay.
Doorashadan ay ku tartamayaan saddexda murrashax ee kala ah Muuse Biixi Cabdi KULMIYE, Cabdiraxmaan Maxamed Cabdullaahi (Ciro) WADDANI iyo Eng. Faysal Cali Waarabe UCID, waa doorashadii saddexaad ee madaxtooyadda oo Somaliland ka qabsoontay tan iyo markii ay qaadatay nidaamka geedi socodka dumquraadiyada iyo xisbiyada badan 2002.
Dadka codkooda bixinaya, ayaa kala dooranaya saddexdaa murrashax, iyadoo doorashada xiligan ee Somaliland ka xamaasad duwanayd labadii doorasho ee hore 2003 iyo 2010, taas oo sababtay in dardaaran is daba joog ah loo jeediyo murrashaxiinta iyo bulshada kaleba.
Xamaasada iyo xiisaha doorashada, ayaa sababay in ay soo jiidato Somaliland indhaha caalamka, iyadoo xiligan ay doorashada u yimaadeen boqolaal goob joogayaal caalami ah iyo weriyayaal ka socda warbaahinta caalamka oo ay soo jiiteen warbixino laga qoray nidaamka dumuqraadiyada Somaliland iyo doorashooyinka xorta ah ee aan Afrika looga baran.