Araweelo News Network.
Muqdisho(ANN)-Ra’iisal wasaaraha xukuumadda Federaalka ee Soomaaliya, Maxamed Xuseen Rooble ayaa bogaadiyay xubnaha laga soo doortay Gedo ee Madaxweyne Farmaajo ku tilmaamay doorashadooda shacridaro.
Laxidhiidha: Madaxweyne Farmaajo Oo Ganafka Ku Dhuftay Doorashada Kuraasta Gedo
Ra’iisal wasaaraahu, wuxuu Guddida Doorashooyinka Heer Federaal, Guddida Doorashada Jubaland iyo dawlad gobolleedka Jubbaland ku bogaadiyay doorashadii ay ku qabteen Magaalada Ceelwaaq ee Gobolka Gedo.
War qoraalka ra’iisal wasaare Rooble, waxaa lagu yidhi, “Waxaan u hambalyaynayaa Guddida Doorashooyinka Heer Federaal, Guddiga Doorashada Jubaland iyo Dawlad gobolleedka Jubaland ee soo gebagebeeyay doorashadii xildhibaannada Gollaha Shacabka ee deegaan doorashadoodu gobolka Gedo”
Qoraalkaa oo Rooble ku baahiyay barta uu ku leeyahay Facebook, wuxuu sidoo kale, ugu hambalyeeyay Xildhibaannada Cusub ee la doortay.
“Hambalyo ayaan leeyahay xildhibaannada cusub ee la doortay, annigoo u rajaynaya in uu Eebbe ku garab galo mas’uuliyadda qaran ee loo igmaday.”ayuu yidhi.
Laxidhiidha: Maamulka Gedo Ganafka Ku Dhuftay Go’aan Kasoo Baxay Guddida Doorashada Heer Federaal
Dhinaca kale, doorashada xildhibaanada ee lagu qabtay Magaaladda Ceelwaaq, waxa sharcidaro ku tilmaamay Madaxweyne Farmaajo, isagoo sheegay in aannay waafaqsanayn xeerka iyo nidaamka loo asteeyay doorashada, balse dhawaaqa Madaxweyne Farmaajo ayaan dheg loo jalaq siin, iyadoo maamulka gobolka Gedo ee xaruntiisu tahay Garabahaarey ay hore uga digeen in doorashada kuraasta Gedo lagu qabto meel kale.
Please share with your friends the news and information provided by Araweelo News Network.
Published by Araweelo News Network.
Follow us Twitter@Araweelonews
Facebook@AraweeloNews
By Arraale M Jama Freelance Journalist and Human Rights activist.
Araweelo News Network.
info@araweelonews.com