Hargeysa(ANN)-Shirkadda Hyundai Dahabshiil Motors, ayaa sharaxaad ka bixisay Gaadiid cusub oo ay dalka keeneen, kuwaas oo ah Baabuur kuwii ugu casrisanaa ee Wershedda Hyundai soo saarto sannadkan cusub ee aynu ku jiro 2020.
Munaasibad lagu soo bandhigay gaadiidkaa oo kasoo degey Dekedda Magalaada Berbera, isla markaana lagu soo daabulay xarunta guud ee Shirkadda Hyundai Dahabshiil Motors ku leedahay Magaalada Hargeysa, ayaa lagu sharaxay ahmiyada ay bulshadda u leeyihiin gaadiidka la keenay iyo faa’idada ku jirta ee danta u ah dadka iibasanaya, iyadoo loogu bushaareeyay adeegyo cusub oo bilaash ah oo ka socda gaadiidka ay shirkaddu keentay.
Guddoomiyaha Guud ee Shirkadda Hyundai Dahabshiil Motors Eng. Cawil Saalax, ayaa sheegay in Baabuurtaa oo kasoo degtay Dekedda Magaalada Berbera ay yihiin kuwii ugu danbeeyay ee ay soo saarto Wershedda Hyundai, isagoo yidhi, “Baabuurtan waxay u badan yihiin (Four-Wheel Drive) 4WD, iyo Basas, waxayna wershedda kasoo baxeen laba bilood keliya, waxaan ugu tala-galay inay Bulshadu ka faa’idaysato, marka laga hadlayo tayada, badbaaddada iyo dhanka raaxada ee qofku dareemayo, waana Baabuur cusub oo leh Shan-sanandood oo Kafaalad ah (warranty), ilaa hadda Baabuurta cusub ee la keenay waxa suuqa-galay oo dadku iibsaden 100 Baabuur, waxaana nagaga soo noqday jawaabo wanaagsan.”
Eng. Cawil Saalax, wuxuu sheegay inay sii wadayaan, isla markaana ay gaadhsiinayaan Baabuurtaa geyiga Soomaalida oo dhan si ay uga faa’idaystaan Bulshada Soomaalidu, isagoo xusay in Dadkii durba iibsaday Baabuurta cusub ay ka heleen fariimo si weyn u dhiiri-geliyay inay keenaan Baabuur intaa ka baddan oo sida uu sheegay wax weyn ka taraya dhibaatooyinka Bulshada Soomaalida ka haysta gaadiidka aan Tayada lahayn.
Sidoo kale, Madaxa suuq-geynta ee Shirkadda Hyundai Dahabshiil Motors, Hibo Maxamed Warsame, ayaa sharaxaad ka bixisay Gaadiidka cusub ee ay dalka keeneen shirkadda Hyundai Dahabshiil Group, waxay sheegtay in Baabuurta aay keenneen aad uga duwan yihiin kuwii hore, isla markaana ay yihiin noocii ugu danbeeyay, midabadana lasoo badiyay oo ay ku jiraan midabo aan hore loo keenin.
Hibo Maxamed Warsame, waxay xustay in Baabuurtu mar ka wada degeen Dekedda Muqdisho ee Soomaaliya iyo Dekedda Berbera ee Somaliland, isla markaana kuwa ka degey dhanka Muqdisho ay toddobaadka danbe suuqa geli doonnaan, waxayna ugu bushaaraysay Bulshada in muddo sannad ah Baabuurka qofka iibsada looga bedelayo wixii ka xumaadda, taas oo ay sheegtay inay noqonay adeeg lacag la’aan ah oo Shirkadda Hyundai Dahabshiil Motors usoo kordhisay, isla markaana waxay xustay inay soo kordhinayaan gaadiidka waaweyn ee xamuulka ah oo noocyo kala duwan iyo wiishash, kuwaas oo ay samaysay shirkadda Shirkadda Hyundai Dahabshiil Motors.
Mid ka mid ah dadka gaadiidka Shirkadda Hyundai Dahabshiil Motors iibsaday, ayaa ka dareen celiyay waxa uu kala kulmay mudadii uu iibsaday, isagoo ka mahad-sheegtay faa’idada Baabuurta ay keentay Shirkadda Hyundai Dahabshiil Motors.
READ: Hyundai sets shop in Somaliland stamping confidence in the country’s stability
AKHRI: Wargeys Laga Leeyahay Masar Oo Warbixin Dheer Ka Qoray Aqoonsiga Somaliland Iyo Horrumarkeeda