Araweelo News Network
Nairobi(ANN)- Hoggaamiyaha mucaaradka Kenya Mr. Raila Odinga, ayaa fagaare dad isugu soo baxeen loogu dhaariyey madaxweynenimada dalkaas saacadihii lasoo dhaafay.
Xilka Madaxweynaha Kenya waxa hore loogu dhaariyey Uhuru Kenyatta oo haatan talada dalkaas gacanta ku haya.
Mr. Raila ayaa kummanaan qof taageerayaashiisa ah oo isugu soo baxay beerta Uhuru ee caasimadda Nairobi hortooda loogu dhaariyey in uu yahay madaxweynaha shacabka Kenya, waxaannu ku dhaartay in uu ilaalin doono dastuurka dalka, isla markaana uu hoggaamin doono qaranka Kenya.
Xilliga la dhaarinayey waxa hareeraha ka taagnaa qaar ka mid ah hoggaamiyeyaasha waaweyn ee mucaaradka ee Kenya, balse goobta ka maqnaa siyaasiga caanka ah ee Kolonzo Musyoka oo ku-xigeenkiisa ah.
Hadal kooban oo uu Raila u jeediyey taageerayaashiisa markii la dhaariyey kadib, waxa uu ku sheegay in shacabka reer Kenya iska ridi doonaan wax uu ku tilmaamay xukunka keligii talisnimada ah.
Xeer-ilaaliyaha Guud ee Kenya, ayaa uga digay Raila dhaarinta xilka madaxweynenimada oo uu xusay inay tahay fal khiyaamo qaran ah, ciqaabtiisuna noqonayso dil toogasho ah.
Tallaabada cusub ee ku kacay hoggaamiyaha mucaaradka Kenya, ayaa si weyn looga cabsi qabaa inay horseeddo qalalaase siyaasadeed oo markale dalkaas ka istaadhma, maadaama aanay suurtogal ahayn in waddanku laba madaxweyne yeesho.