Araweelo News Network
Mogadishu(ANN)Wararka ka imaanaya xarunta gobolka Hiiraan ee Beledweyne, ayaa sheegaya in maanta barqadii uu qarax ka dhacay gudaha Garoonka diyaaradaha Macmalka Beled weyne oo ay gacanta ku hayaan ciidamo Djiboutian iyo Ethiopian ah.
Goob joogayaal ayaa sheegay in qarax xooggan uu ruxay goob Koontarool ah oo ciidanka Djibouti ay ku baadhayeen dadka ka dhoofa Garoonka Ugaas Khaliif
Saraakiisha ammaanka ayaa faah-faahin ka bixiyay Qaraxa iyo khasaaraha ka dhashay, iyadoo Taliyaha Saldhiga Degmada Baledweyne Col. Cali Dhuux Mahad Alle, sheegay in Qaraxaasi ahaa Labtop lagu soo xidhay waxyaabaha qarxa oo lagu doonaayay in lagu dhibaateeyo shacab doonaayay inay raacaan Diyaarad ka timid Magaalada Muqdisho.
Col. Cali Dhuux Mahad Alle, wuxuu sheegay Qaraxaasi in la soo saaray Gaadhiga Baska ee lagu soo qaadoo dadka doonaaya inay raacaan Diyaaradaha Garoonka ka dhoofaya.
Qaraxa ayuu sheegay inuu ka dhacay goob alaabta lagu baadho meel Afaafka hore ee Garoonka, wuxuu ku tilmaamay waxa loo adeegsaday Labtopka lagu soo idhay walxaha Qarxa, kaasoo la soo saartay gaadhi, isagoo xusay in baadhtiisu socoto.
“Nasiib wanaag Lab top ayaa qarxay, waxaana uu ku qarxay afaafka hore ee garoonka, ciidamadu waxa ay ku guuleysteen inay qaraxyo ka furaan labo waxyaabo kale oo qaraxyada lagu soo xidhay, kuwaasi oo ay ka midyihiin Printer, waxaana ku dhaawacantay Lix ruux, oo labo ka mid ah ay ahaayeen ciidanka booliska, halka inta kale ay shacab yihiin” ayuu yiidhi Taliyaha saldhiga Booliska ee Beledweyne.
Col. Cali Dhuux wuxuu tilmaamay inu socdo Baadhitaanka cida ka dambeysa inkastoo uu ku eedeeyay arintaan inay ka dambeeyeen Al-Shabaab oo sida uu sheegay dhibaateynayay shacabka Soomaaliyeed.
Dhinaca kale Al-shabaab, ayaa sheegatay qaraxyada ka dhacay Beledweyne Sida ay baahisay Idaacadda Islaamiga Andalus ee Afka Xarakada Al-shabaab ku hadasha waxaa qaraxa mas’uul ka ahaa Al Shabaab, ayaa lagu yidhi war laga sii daayay Idaacada Andallus, waxayna ku sheegeen warkaa in qaar ka mid ah Askarta ciidamada Djibouti khasaare ugu geysteen qaraxa.