Maxay Kaga Hadleen Golaha Wasiirada Somaliland Fadhigii Online-ka Ahaa Ee Madaxweyne Biixi Guddoominayay?
Hargeysa(ANN)-Fadhigii golaha wasiirada Jamhuuriyadda Somaliland oo uu shir-guddoominayey Madaxweynaha Jamhuuriyadda Somaliland, Mudane Muuse Biixi Cabdi, ayaa maanta ku qabsoomay habka maqalka iyo muqaalka, iyadoo golaha wasiirradu shirka kaga qaybgaleen, iyagoo jooga xafiisyadooda, taas oo ka mid ah talooyinka caafimaad ee xanuunka Covid-19.
Waxaana shirkaasi lagaga wada hadlay Xannuunkan dunida saameeyey ee Covid-19, xoojinta go’aankii hore ee lagu joojiyey qaadka muddo kooban, sidii ay dalka u soo gaadhi lahaayeen daawooyinka iyo mucaawimooyinka Somaliland loogu talo-galay ee ay ku soo deeqayaan muwaadiniinta Somaliland ee hantida leh iyo dalalka daneeya Jamhuuriyadda Somaliland, iyo dardar gelinta hannaanka wacyigelineed ee xanuunka safmareenka ah ee Coronavirus.
Markii shirka Online-ka ee golaha Wasiirada Somaliland soo xidhmayna waxa faah-faahin ka bixiyey afhayeenka Madaxweynaha Jamhuuriyadda Somaliland, Mudane Maxamuud Warsame Jaamac.