Araweelo News Network
Sarkozy markii uu madaxweynaha noqday wuxuu heshiisyo waawayn oo ganacsi la galay Madaxweynihii hore ee Liibiya Qadafi 2007dii
Paris(ANN)-Madaxweynihii hore ee dalka Faransiiska Nicolas Sarkozy ayaa sheegay in ay noloshiisa galiyeen “cadaab” eedaymaha loo haysto ee ku saabsan in lacagihii uu u adeegsaday doorashada uu ka helay madaxweynihii hore ee Liibiya Mucammar Qadafi.
“Waxaa la igu eedeeyay wax aan caddayn loo haynin,” ayuu garsooreyaasha ku ydhi Sarkozy oo la dul dhigay baadhitaan rasmi ah, sida uu ku warramay wargayska Le Figaro oo ka mid ah Wargeysyada ugu caansan dalka Faransiiska.
Sarkozy, ayaa maalmihii lasoo dhaafay Boolisku u qaateen Saldhig Boolis waxaana la baadhayaa in uu sameeyay ol’ole doorasho oo sharci darro ah sannadku markuu ahaa 2007-dii, Iyo inuu sixun u isticmaalay dhaqaale ay dawladda Liibiya lahayd oo laaluush ahaan uu u aqbalay balse Sarkozy oo 63 jir ah ayaa diiday in uu wax khalad ah sameeyay.
Siyaasigan oo ay aragtidiisu tahay midig dhexe. ayaa la siidaayay Arbacadii ka dib markii labo maalmood su’aalo la waydiinayay, wuxuuna sheegay in dadka reer Liibiya ee dacwaynaya ay ka aargoosanayaan maadaama uu amray in diyaaradaha dagaalka ee Faransiisku ay garaacaan Liibiya intii lagu gudo jiray kacdoonkii Qadaafi xilka lagaga tuuray sannadkii 2011kii.
Brice Hortefeux oo ka mid ahaa golihii wasiirrada ee Sarkozy oo xulafo dhawna la’ahaa madaxweynaha ayaa isna lagu warramay in booliisku ay su’aalo waydiiyeen maalintii shalay, iyadoo ay jiraan saraakiil kale oo baadhitaankaa su’aalo lagu weydiiyay.