Araweelo News Network
Washington(ANN)-Madaxweynaha Mareykanka Donald Trump ayaa xilkii ka qaaday madaxii Hay’adda dambibaadhista ee FBI-da, James Comey.
Aqalka Cad ayaa sheegay in Madaxweyne Trump uu go’aankiisa ku saleeyey talooyin uu ka helay xeer ilaaliyaha guud Jeff Sessions iyo ku xigeenkiisa.
Go’aanka Madaxweyne Donald Trump xilka kaga qaaday James Comey, ayaa soo baxay ka dib markii madaxii Hay’adda FBI, Mr. Comey uu macluumaad khaldan oo ku saabsan baadhitaannada Emailda Clinton uu la wadaaagay koongareeska Mareykanka.
Warqadda uu xilka kaga qaaday ee loo diray madaxii Hay’adda FBI, Mr, Comey ayaa madaxweyne Trump ugu sheegay in uu ku guul darraystay in uu si haboon u hoggaamiyo hay’adda FBI-da, isla markaana ay lagama maarmaan u tahay in hoggaan cusub loo helo hay’adda si loo soo celiyo kalsoonidii bulshadu ku qabtay hawlaheeda muhiimka ah ee ilaalinta sharciga ah.
Haseyeeshee xisbiga Dimuqraadiga ayaa sheegay in xil ka qaadista Mr. Comey ay salka ku hayso baadhitaanka xidhiidh sida la sheegay dhex maray sannadkii hore Ruushka iyo xubna la mid ah xiligii uu socday ololahii Trump.
Hoggaamiyaha xildhibaanada Senate-ka kaga jira xisbiga dimuqraadiga, Chuck Schumer, ayaa tallaabadaas ku tilmaamay mid welwel dhalin karta.
Aqalka Cad wuxuu sheegay inuu billaabay baadigoobka qofkii bedali lahaa Comey.
Waa markii labaad oo xil ka qaadis lagu sameeyo agaasime hay’adda FBI-da isagoon xilligiisa dhameysan mudadii ay jirtay xukuumadda Trump.