Hargeysa(ANN)-Madaxweynaha Jamhuuriyadda Somaliland, Mudane Muuse Biixi Cabdi waxa uu maanta ka qayb-galay xafladda qalin-jebinta dufcadii 16-aad ee Jaamacadda Hargeysa ka qalin-jebisa oo dhamaa 883 Arday laguna qabtay isla hoolka Hargeisa University.

Madaxweynuhu, wuxuu xadhiga ka jaray dhisme cusub oo lagu soo kordhiyey mac-hadka nabadda iyo xalinta khilaafaadka, waxaanu soo kormeeray dhismayaal cusub oo ka socda jaamacadda.

Xafladda qalin-jebinta oo ahayd mid ballaadhan waxa hadalo ka jeediyey masuuliyiin kala duwan oo dhammaantood ku dheeraaday horumarka jaamacadda iyo hambalyada Ardayda qalinbisay.

Madaxweynaha Jamhuuriyadda Somaliland, Mudane Muuse Biixi Cabdi oo khudbad ka jeediyay halkaa wuxuu madasha hambalyo u diray ardayda qalin-jibisay, waxaanu ardaydaasi u jeediyey dar-daaran la xidhiidha sidii ay u sii wadan lahaayeen aqoontooda, dalka iyo dadkana uga faa’iidayn lahaayeen.

  Madaxweyne Biixi, wuxuu ka hadlay arrimo la xidhiidha qarannimada, isagoo fariina u diray dalka aynu jaarka nahay ee Soomaaliya.

Gebagebadiina waxa uu madaxweynuhu shahaadooyin gudoonsiiyey Ardaydii kaalmaha ugu sareeya ka galay jaamacadda Hargeysa (Hargeisa University) iyo masuuliyiin ay jaamacadu ku maamuustay doorkii ay ku lahaayeen jaamacadda horumarkeeda.

Sidoo kale waxa madasha ka hadlay Guddoomiayaha Jaamacadda Hargeysa, Dr. Maxamuud Yuusuf Muuse, gudoomiyaha Boodhka Jaamacadda Hargeysa, Garyaqaan Cabdisamad Maal, Madaxweynaha Jaamacadda Mekelle University ee dalka Ethiopia Dr. Kindeya gebrehiwot, Maamulaha Xidhiidhka dadweynaha ee shirkada Telesom Maxamed Cabdi Darbo, Afhayeenka Xisbiga Waddani Barkhad Jaamac Batuun, Xoghaye ku xigeenka xisbiga Ucid, Naasir Yuusuf Cismaan (Qodax), Wasiirka hawlaha guud iyo guryeynta, Cabdirashiid Ducaale Qambi oo ku hadlayey afka Ardayda qalin-jebisay Maanta iyo Wasiirka wasaaradda waxbarashada iyo sayniska, Cismaan Jaamac Aadan.