Hargeysa(ANN)Madaxweynaha Jamhuuriyadda Somaliland mudane Axmed Maxamed Silaanyo, isagoo ku hadlaya magaciisa iyo ka shacbiga Somaliland-ba waxa uu dhambaal tacsi ah u dirayaa waayeelka, waxgaradka, aqoonyahanka, qoyskii, eheladii, qaraabadii, asxaabtii iyo guud ahaan shacbiga Somaliland, isaga oo ka tacsiyadaynaya geerida ku timi Allaah ha u naxariistee marxuum Axmed Aadan Cali (Goodir) oo ku geeriyooday magaaladda Hargeysa taariikhdu markay ahayd 04/12/2016.
Madaxweynaha Somaliland mudane Axmed Maxamed Silaanyo, waxa uu marxuumka ku sifeeyey oday ruug caddaadiya oo taariikh ma guurto ah kaga tegay dalka, ahaana siyaasi wax badan u soo joogay oo waayo-arag ah, shaqooyin iyo xilal kala duwanna ka soo qabtay dawladihii kala dambeeyey ee soo maray dalka ka mid ahaa Komishankii Doorashooyinkii ugu horreeyey ee Somaliland yeelato, waxaannu hadda ahaa La-taliyaha Madaxweynaha ee Arrimaha Dawladaha Hoose.
Madaxweynuhu waxa uu marxuumka Alle uga baryayaa inuu naxariistii janno ka waraabiyo waayeelka, waxgaradka, aqoonyahanka, qoyska, ehelada, qaraabada, asxaabta iyo guud ahaan shacbiga Somaliland ee uu ka baxdayna samir iyo iimaan ka siiyo.

TACSI
IN-NAA LILLAAHI WA IN-NAA ILAYHI RAAJICUUN
Guddoomiyaha Golaja Wakiillada Jamhuuriyadda Somaliland, ahna murrashaxa Madaxweyne ee Xisbiga mucaaradka ah ee WADDANI Md. Cabdiraxmaan Maxamed Cabdillaahi (Cirro), isagoo ku haddlay magaciisa, ka mudanayaasha golaha iyo ka xisbiga waxa uu dhammabaal tacsi ah u dirrayaa siyaasiyiinta waxgaradka aqoonyahayn asxaabta, ehelada, qaraabada, qoyska iyo guud ahaanba shacabka reer Somaliland isagoo ka tacsiyadanaya geeridii ku timmi Allaah ha u naxariistee marxuum Axmed Aadan Cali (Goodir) oo xalay (habeenkii Axadda) ku geeriyooday magaalada Hargeysa 04/12/2016.
Murrashax Cirro ayaa marxuumka ku sifeeyey inuu ahaa marxuumku halyey dalkiisa iyo dadkiisa jecel, isla markaana ku dhaata Somaliland-nimada, isagoo ahaa xubnihii ugu horeeyey ee guddigii ugu horreeyey ee doorashooyinka qaranka Somaliland uu yeesho, waxa kale uu ahaa siyaasi ruug-caddaa ah oo door weyn ka soo qaatay xaaladdii siyaasadeed ee dalka, waxaannu hadda hayey marxuumku xilka La-taliyaha Madaxweyne Siilaanyo ee Arrimaha Dawladaha Hoose.
Guddoomiyaha Golaha Wakiillada Somaliland ahna murrashaxa Madaxweyne ee Xisbiga WADDANI Md. Cabdiraxmaan Cirro ayaa wuxuu marxuumka Alle uga baryayaa in uu janadii Fardowsa ka waraabiyo, qoyska, ehelada, qaraabada, asxaabta iyo shacbiga Somaliland uu ka siiyo samir iyo iimaan.