Madaxweyne Xasan Sheekh, ayaa sheegay in ujeedada booqashadiisa Garoowe ee maamul goboleedka Puntland ay la xidhiidho shirka Maamul goboleedyada oo la filayo in maalinta beri uu ka firmo halkaa, wuxuuna xusay in ka hor inta aan la gaadhin shirka uu doonayo inuu maamul goboleedka Puntland kala hadlo arrimo la xidhiidha Nidaamka Federaalka iyo tabashooyin ay Puuntland ka tirsanayso dawlada Federaalka ee uu madaxda u yahay.
Dhinaca kale masuuliyiin ka socota Maamul goboleedyada Jubba ee Kismaayo iyo Koonfur galbeed ee Soomaaliya ayaa la filayaa inay maalinta beri gaadhaan Garoowe, kuwaas oo ka qaybgelaya shirka Maamul goboleedyada iyo dawlada Federaalk ah oo sadex bilood ka hor lagu qabtay magaalada Muqdisho, waxaana la filayaa in lagaga hadlo arrimo la xidhiidha dhamaystirka nidaamka Federaalka iyo maamul goboleedyada Somalia loo samaynayo.
Madaxweynaha Somalia, ayaa la geeyay guriga Madaxtooyada Puntland oo amaankiisa aad loo adakeeyay, iyadoo todobaadyadii lasoo dhaafay qarax ka dhacay Garoowe oo khasaare dhaliyay lala beegsaday shaqaalaha Hay’adda Qaramada Midoobay ee ku sugan Garoowe.
Booqashada Madaxweynaha Somalia ee Garoowe, waxay kusoo beegantay, iyadoo horaantii bishan April 2015, uu magaalada Garoowe booqday Raysal Wasaaraha Somalia Cumar Cabdirashiid, isla markaana heshiis la xidhiidha arrimaha Federaalka la saxeexday Madaxweynaha maamul goboleedka Puntland Cabdiweli Gaas.
Araweelo News Network
Somaliland Office
Email info@araweelonews.com
Jaamac132@gmail.com
Twitter: Arraale M Jama @Araweelonews.