Araweelo News Network
Djibouti(ANN)-Madaxweynaha Dalka Djibouti Ismaaciil Cumar Geele, ayaa sheegay in mucaaradka dalkiisa ee dibad jooga ah ay kusoo laaban karaan dalka, wuxuuna ku dooday in aanay jirin wax dhibaato iyo faquuq ah oo lagu hayo mucaaradka Dalka ee ku kacsan xukuumaddiisa.
Madaxweyne Ismaaciil Geele oo arrintaa ka hadlaya ayaa yidhi. “Qof ra’yigiisa lagu xidhay annagu ma hayno , qof la dilayna ma hayno, qof la xukumay ma hayno, haddii aanu isagu ku xadgudbin xoriyadda dadka kale oo aanu ku xadgudbin qaanuunka dalka”
Dhinaca kale Madaxweyne Ismaaciil, wuxuu ka hadlay dacwad u dhaxeysa dowladiisa iyo shirkadda dekedaha ee DP World, taas oo dowladda djibouti ay ka wareejisay maamulka dekada Dooraale.
Madaxweynaha ayaa sheegay in djibouti ay leedahay saamiyada ugu badan shirkadda, ayna arkeen shirkadda DP World in aanay ka shaqaynayn danaha dekedaha djibouti, sababtaana ay ula wareegeen maamulka dekedda Dooraale, isagoo yidhi “Waanu ognahay saamigoodiii, balse waa in laysku ixtiraamaa sida loo kala saami badanyahay”.
Mudane Ismaaciil Cumar, wuxuu arrimahaa iyo kuwo kale kaga hadlay wareysi gaar ah oo uu siinayay tafatiraha laanta Afka Soomaaliga ee BBC-da Cabdullaahi Cabdi, isagoo sidoo waraysigaa ka hadlay ganacsiga iyo muhiimadda saldhigyada Millateri u leeyihiin dalkiisa oo sida uu sheegay kaalin wayn ka qaadanayaan ka shaqaynta nabadda iyo danaha dalkiisa Djibouti.
Waxa kale oo uu Madaxweyne Ismaaciil Cumar Geele sheegay in loo baahan yahay in dhaqaale lagu bixiyo xoojinta ciidammada soomaaliya si nabadda loogu soo dabbaalo dalkaa.