Araweelo News Network
Mr. Gaas oo warbaahinta kula hadlay magaalo-xeebeedda Boosaaso shalay, kadib markii uu ka soo laabtay socdaallo uu ku tegay dalalka Itoobiya iyo Isu-tagga Imaaraadka Carabta, waxa uu ku dooday in aanay maamullada Puntland iyo Galmudug wadin dagaallada ka socda Gaalkacyo ee badhtamaha waddanka Soomaaliya, balse laga soo abaabulayo magaalada caasimadda ah ee Muqdisho.
“Waxa yaab leh cadow mar walba duullaan kugu ah oo ka soo horjeeda sidii wax loo dhisi lahaa oo dawlad lala wadaagi lahaa… Dawladda Federaalka Soomaaliya ayaa masuul ka ah dagaallada ka socda magaalada Gaalkacayo oo ah qaar aan indhaha laga qarsin karin,” ayuu yidhi Madaxaweynaha maamul-goboleedka Puntland.
Dhinaca kale, Cabdiweli Gaas waxa uu shacabka maamulkiisa ugu baaqay inay si wadajir ah u xoojiyaan ammaanka Puntland, isla markaana difaacdaan deegaannadooda, kana shaqeeyana midnimada Soomaaliya.
“Puntland waxay doonaysaa derisnimo-wanaag, midnimo iyo in maamul-goboleed walba dhankiisa uga shaqeeyo horumarka dalka iyo midnimada Soomaaliya,” ayuu hadalkiisa ku daray.
Sidoo kale, maamulka Puntland ayaa hore ugu eedeeyey dawladda taagta daran ee Soomaaliya inay gacan ku siinayso maamul-goboleedka Galmudug dagaallada ka socda Gaalkacyo.
Ra’iisal-wasaaraha maamulka Muqdisho Mr. Cumar Cabdirashiid ayaa bilaabay dadaallo lagu joojinayo colaadaha ka taagan Gaalkacyo toddobaadkii hore, balse dedaalladaasi waxay u muuqdaan qaar ku guuldarraystay in wax lagaga qabto dagaallada khasaaraha baahsan dhaliyey ee maamullada Puntland iyo Galmudug ku dhexmaraya magaaladaas oo midkoodba dhinac maamulo.
Geesta kale, dagaallo qadhaadh oo dad badan ku dhinteen ayaa ciidammada Puntland iyo Galmudug ku dhexmaraya gudaha magaalada Gaalkacyo dhowrkii maalmood u dambeeyey, iyadoo dagaalkii ugu culuslaa labada dhinac iskaga horyimaaddeen shalay.
