Araweelo News Network
Af-madaw(ANN)Dagaallo culus oo muddo ka badan laba saacadood socday ayaa laga soo sheegayaa duleedka degmada Af-madaw.
Dagaalka ayaa sida ay wararka ka imanaya deegaankaa sheegayaan dhexmaray ciidamada xarakada Al-Shabaab kolanyo ciidamo Kenyaan ah oo dhinaca Jubbada Hoose u socday, kuwaas oo kasoo baxay degaanka Qooqaani.
Ma jiro war si dhab ah u xaqiijinaya khasaaraha dagaalka, balse warar laga soo xigtay dadka deegaanka ayaa sheegaya in dagaalku ahaa mid culus, isla markaana uu jiro khasaare labada dhinac oo aan la ogayn inta uu leegyahay.
Xukuumadda Kenya, ayaan weli ka hadlin dagaalka, balse warar hordhac ah oo laga soo xigtay saraakiisa Al-sabaab, ayaa sheegay in ugu yaraan laba askari Kenyan oo ciidamaa Kenya ah maxaabiis ahaan loogu qabtay dagaalka halka 12 askari oo katirsan Melleteriga Kenya meydadkooda lagu arkay goobta dagaalka.
Sidoo kale wararka laga soo xigtay saraakiisa Al-shabaab, ayaa sheegaya in 6 kamid ah gaadiidka gaashaaman ee ciidanka Kenya lagu gubay dagaalka, wararka ayaa intaasi ku daraya in mid kamida diyaaradaha dagaalka melleteriga Kenya waxyeello kasoo gaadhay, kadib madaafiicda lidka diyaaradaha oo lala helay xilli ay isku dayayeen inay gacan siiyaan ciidamadooda jidgooyada loo galay.