Araweelo News Network
Hargeysa (ANN)-Wasiirka Wasaaradda Hawlaha Guud ee Jamhuuriyadda Somasliland Md. Xasan Cali Maxamed (Cali Mareexaan), ayaa xafiiskiisa ku qaabilay weftia ka socday hay’addaha Midawga Yurub iyo GIZ, kuwaasoo ka wadahadleen mashaariicda horumarinta dhinaca waddooyinka.
Sidaana waxa lagu sheegay warsaxaafadeed ka soo baxay xafiiska Wasiirka Hawlaha Guud ee Somaliland, kaasoo u qornaa sidan; “Kulanka waxa Wasiirka ku wehelinayey Maareeyaha Hay’adda Waddooyinka Mr. Xasan Cali Cismaan, Wasiir-ku-xigeenka Wasaaradda Qorshaynta Mudane Kaysar iyo xubno kaloo ka socday Hay’adda Waddooyinka Somaliland ee RDA.
Dhinaca weftiga waxa hogaaminaysay Mss. Susanne Martin oo ah Madaxa Arrimaha Bulshada iyo Kaabayaasha Dhaqaalaha u qaabilsan Midawga Yurub “Head of Infrastructure and Social Sector”, Madaxa Hay’adda GIZ u qaabilsan Somaliland Mr. Hendrik Linneweber iyo xubno kaloo wehelinayey weftiga.
Wasiir Cali Xasan Maxamed Xasan ayaa u gudbiyey Qorshaha Hay’adda Waddooyinka, mashaariicda hadda ay gacanta ku hayaan iyo kuwa fulay, mashaariicda soo galay iyo goobaha wax lagaga qabtay, waddooyinka iyo biriijyada la dayactirey, wuxuuna ku wargeliyey in Dawladdu kordhisay miisaaniyaddii hore loogu bixin jirey waddooyinka sannadihii 2010 Ilaa 2017.
Daneeyayaashan horumarinta waddooyinka ee iskugu jirey hay’addaha kala duwan iyo Midawga Yurub ayaa ugu bushaareeyey wasiirka inay gacan buuxda ka geysan doonaan intii horena ka sii libinlaabi doonaan horumarinta waddooyinka Somaliland, waxayna uga mahadnaqeen sida wacan ee ay mashaariicda ula fuliyeen intii ay wada jirka uga shaqeeyeen,” ayaa lagu yidhi warsaxaafadeedka ka soo baxay Wasaaradda Hawlaha Guud.
