Araweelo News Network

Muqdisho (ANN)- Ilaa 17 dagaalyahan oo ka tirsan kooxda Al-shabaab, ayaa ku dhintay qarax ka dhashay baabuur miinaysan oo ay wateen maalintii Jimcaha.
War qoraal ah oo ka soo baxay Hawlgalka Midowga Afrika ee Soomaaliya (AMISOM), ayaa lagu sheegay in xubnaha ka tirsanaa xoogagga Al-shabaab ku dhinteen qarax ku xidhnaa gaadhi ay wateen oo marayey meel qiyaastii 23km u jirta degaanka Biyo-cadde, Gobolka Shabeellaha Dhexe ee koonfurta dalka Soomaaliya.
“17 xubnood oo Al-shabaab ah ayaa naftooda ku waayey walxaha qarxa oo u saarnaa gaadhi ay wateen gelinkii maalintii Jimcaha,” ayaa lagu yidhi qoraal kooban oo lagu baahiyey mareegta Twitter-ka ee ciidammada AMISOM.
Hase ahaatee, AMISOM fahfaahin dheeraad ah kama bixin halka uu ku wajahnaa baabuurka miinaysan ee ku qarxay dagaalyahannada Al-shabaab ee saarnaa oo tiradoodu ahayd 17 xubnood, isla markaana dhammaantood ku dhinreen qaraxaas.
Kooxda Al shabaab ayaan dhankooda ilaa hadda ka hadal qaraxa ciidanka AMISOM sheegeen in dagaalyahanno badan kaga dhinteen duleedka degaanka Biyo-cadde.
Dhanka kale, taliska AMISOM ayaa ka dalbay shacabka waddanka Soomaaliya ee dagaalladu aafeeyeen inay sii wadaan la-shaqeynta ciidammada ammaanka si looga hortago weerarrada Al-shabaab, loona nabadeyn lahaa dalkooda oo idil.