Araweelo News Network
Dubai(ANN)Raysal-wasaaraha Isu-taga Imaraadka Carabta (UAE), ayaa ku dhawaaqay in dawladiisu si gaar ah u samaynayso Wasaarad ka shaqaysa, isla markaana ka hawlgasha ilaalinta farxadda muwaadiniintooda.
Sheekh Maxamed bin Rashid Al Maktoum oo sidoo kalena ah Maamulaha Dubay, ayaa faalladan ku qoray bogga uu Twitter ku leeyahay, kadib markii uu ka qaybgalay Shir Caalami ah oo Imaaraadku martigeliyey (World Government Summit). Waxa kaloo uu ku dhawaaqay in Wasaaradaha Dawladiisu u baahan yihiin in la ballaadhiyo, loona baahan yahay hay’addo ka shaqeeya bulshada Gacanka Carabta is dhex galkooda, maadaama ay ku nool yihiin dad aad ugu kala gedisan xagga qabiillada iyo caqiidooyinka. “Waa bilawgii safar cusub oo horumarineed oo aadka lagu siinayo, Allana aan ku waydiisanayno inuu naga caawiyo daryeelka dadka,” ayuu yidhi Raysal-wasaaruhu. Farriintan uu twitter ku qoray ee uu ku sheegay inuu samaynayo Wasaarad farxadda dadka Imaaraadka Carabta ka shaqaysa kuma uu xusin wax waqti cayiman ah, balse waxa uu xusay in nidaamka cusub ee uu federaalka dawladiisa u dejinayo ay ka timi markii uu la tashaday boqorada iyo masuuliyiinta dalkaas.
Sidoo kale, toddobaadkii hore waxa uu Raysal-wasaaruhu bogga twitter ku qoray in da’ yarta 25 hoos uga yar lagu darayo Wasaaradaha Imaaraadka Carabta si ay ugu hadlaan codka dhallinyarada.
Follow us: @Araweelonews on Twitter | Arraale M Jama
Araweelo News Network
Somaliland Office Email info@araweelonews.com Jaamac132@gmail.com