Araweelo News Network
Ceergaabo(ANN)Alleh ha u naxariistee waxa magaalada Ceergaabo ee xarunta gobolka Sanaag ku geeriyooday Marxuum Chief Caaqil Maxamed Jaamac Ismaaciil oo ku magacdheeraa (Bidhaan) oo ka mid ah haldoorka Madaxdhaqameedka gobolka Sanaag.
Marxuumka oo mudooyinkii u danbeeyay u jiifay xanuun, balse dhowaan caafimaadkiisu wanaagsanaa, ayaa xalay saqdii dhexe ku xijaabtay gurigiisa, waxaana maanta lagu aasayaa magaalada Ceergaabo.
Marxuum Chief Caaqil Maxamed Jaamac Ismaaciil oo ku magacdheeraa (Bidhaan), wuxuu ahaa Odayaasha iyo haldoorka loo daba fadhiisto dhaqanka, isla markaana wuxuu ahaa Aftahan Gabyaa iyo hal-abuur ku xeel dheer garta iyo garnaqsiga, wuxuu ahaa Xeer-beegti ku xeeldheer garta oo aan looga maarmin xaajooyinka murga, isla markaana wuxuu ahaa Oday si weyn looga qadariyo gobolka iyo deegaamo kaleba oo lagu ixtiraamo xeeldheerida dhaqanka.
Sidoo kale Marxuum Maxamed Jaamac Ismaaciil (Bidhaan), oo kasoo jeeda Qoys caan ka ah gobolka Sanaag, wuxuu Awoowgii Ismaaciil Xasan ahaa Nin si weyn looga yaqaanay deegaamada Bariga Somaliland xiligiisii, isla markaana halkudhegyadii iyo maahmaahii iyo sheekooyinkii uu ka tegey ay bulshada bulshada gobolka Sanaag iyo deegaamo kale oo geyiga Soomaalida kaleba laga isticmaalo.
Marxuum Maxamed Jaamac Ismaaciil (Bidhaan), waxaan Alleh uga baryaynaaa inuu naxariistii jana-fardawsa ka waraabiyo dhamaanteena Samir iyo Iimaan inaga siiyo.
