Araweelo News Network
‘Ilaahayoow Taag ma Hayno oo Waannu kuu Cabanaynaaye noo soo Gurmo oo Abaarta Naga Saar’
Guddoomiye Saleebaan oo saxaafadda la hadlay shalay, ayaa sheegay in xildhibaannada Golaha Guurtida oo tiradoodu dhan tahay 82 xubnood mid walba mushaharkiisa ka jaray laba milyan oo shillinka Somaliland ah (2,000,000 SLSH) bil kasta, soconna doonta muddo bilood.
“Abaar ballaadhan oo dalka oo dhan wada saamaysay ayaa ina heshay. Muddo dheer ayaan jirayoo weli abaar tan kale ah maan arag. Abaartii Siiga-case oo dalka ka dhacday qiyaastii ilaa 1949 amma 1950-kii ayaa jirtay oo sidan oo kale inooma dhibaatayn. Waxa kaloo jiray abaartii Daba-dheer oo iyaduna tan oo kale ma ahayn. Weli inama soo marin abaar tan oo kale gees ilaa gees isaga gudubta dalka. Ilaahay ha innaga soo gaadho. Ilaahayoow taag ma hayno oo waannu kuu cabanaynaaye noo soo gurmo oo abaarta naga saar,” ayuu yidhi Guddoomiyaha Guurtida.
“Golaha Guurtidu waxa uu iska gooyey saddex bilood oo bil kastaaba tahay 2 milyan oo shillinka Somaliland (oo xildhibaan kastaaba ka jarayo mushaharkiisa), waxaanna laga bilaabayaa bishan lagu jiro, wayna ku mahadsan yihiin.”
Xildhibaannada Golaha Guurtida oo ah 82 xubnood, waxa xildhibaan kastaa ku deeqay laba milyan oo shillinka Somaliland ah oo bil kasta laga jarayo mushaharkiisa, taasoo saddexda bilood noqonaysa 6 milyan (6,000,000SLSH), waxayna wadar ahaan noqonaysaa 492,000.000slsh (afar boqol, sagaashan iyo laba milyan), una dhiganta $65,600 (shan iyo lixdan kun, lix boqol) oo doollar marka lagu sarrifo sicirka halka doollar ka joogo suuqa Hargeysa.
