Araweelo News Network
Xildhibaan Cabdi Xaashi
Mogadishu(ANN)- Xildhibaanada Aqalka Sare ee Baarlamaanka Soomaaliya, ayaa u doortay Guddoomiyaha Aqalka Sare Xildhibaan cabdi xaashi oo helay 43 ka mdi ah codadka xubnaha Aqalka Sare oo ay codeeyeen 52-xubnood, halka xildhibaanka la tartamayay oo ahaa Mustafe Qodax uu helay sagaal cod oo keli ah.
Codeynta, ayaa saaka dhacday xarunta Aqalka sare ee Soomaaliya ee magaalada Muqdisho oo si ku meelgaadh ah ugu sii shaqaynaya Xarunta Aqalka Sare ee cusub oo ah dhismo dhowaan la dhisay oo loogu talagalay in Gabdhuhu ay ku bartaan farsamada Gacanta.
Sidoo kale, xildhibaan Abshir Maxamad Axmed, ayaa loo doortay gudoomiye ku xigeenka koowaad ee Aqalka Sare ee Baarlamaanka Soomaaliya, kaasoo loolan adag uu dhexmaray Xildhibaan Cabdi Axmed Dhuxulow oo ay isla gaadheen illaa wareegga seddaxaad, balse markii danbe guushu raaacday Xildhibaan Abshir Maxamad Axmed oo ku adkaaday inuu noqdo gudoomiye ku xigeenka koowaad ee Aqalka Sare.
Xildhibaan Abshir ayaa helay 30 cod, halka Cabdi Axmed Dhuxulow uu helay 22 cod, iyadoo tirada codeynaysay ay ahaayeen 52 xildhibaan.
Gudoomiya ku xigeenka labaadna waxaa loo doortay xildhibaan Mowliid Xuseen Guhaad oo helay 28 cod, wuxuu ka guuleystay xildhibaan Cabdikafi Macalin Xasan oo helay 24 cod.
Dhowaan, ayaa Magaalada Muqdisho lagu qabtay doorashada gudoomiyaha golaha shacabka iyo ku xigeenadiisa, waxaana la filayaa in loo gudbo doorashada Madaxweynaha oo ay u taagan yihiin murrashaxiin badan.