Boorama(ANN)-Golaha deegaanka Magaalada Boorama ee Xarunta gobolka Awdal, ayaa doortay Maayar Iyo Mayaar ku xigeen cusub. Kadib markii ay saaka yeesheen fadhi aan caadi ahayn, iyadoo fadhigaa xilka lagaga qaaday maayarkii hore Maxamed Xuseen Maydhane oo xilkaa hayay tan Iyo dabayaaqadii 2015.

Tartan adag ayaa dhexmaray Maayarkii hore ee Boorama Saleebaan Xasan Xadi iyo ku xigeenkiisii hore Maxamed Muxumed Faarax (Dheerayste), oo ku loolamay xilkaa, waxaana ku guulaystay maayarka cusub ee Boorama Saleebaan Xasan Xadi oo Hal cod kaga badiyay Xildhibaan Dheerayste.

Fadhigan saaka xilka lagaga qaaday Maayarka, Isla markaana lagu doiranayay Maayarka cusub. waxaa kasoo xaadiray labaatan xildhibaan, iyadoo uu maqnaa xildhibaan keliya.

Wasiir Dawlaha Amniga Maxamed Muuse Diiriye iyo Badhsaabka Gobalka Awdal Cabdiraxmaan Axmed Cali, ayaa goob joog ka ahaa fadhiga golaha deegaanka Boorama, waxaana fadhigaa xilka lagaga qaaday Maayarkii hore, Isla markaana lagu doortay Maayarka cusub lala xidhiidhiyay kadib markii Hanti dhawraha Somaliland uu baadhitaan ka waday halkaa maalmihii u danbeeyay. Iyadoo xilka qaadistiisa lala xidhiidhiyay natiijada baadhitaankaa Hanti dhawrka guud ku saneeyay xafiiskiisa.