Araweelo News Network
Jean-Yves le Drian
Paris(ANN)-Wasiirka gaashaan dhigga Dalka Faransiiska, ayaa sheegay in sannadkii hore Afar iyo labaatan kun oo weerar oo xaggaha dhinaca internet-ka lagaga soo qaaday kombuyuutarrada wasaaradda gaashaan dhigga, kuwaas oo la fashiliyey.
Jean-Yves le Drian ayaa sheegay in weerarrada noocan ahi sannad ba sannadka ka dambeeya ay laban laabmayeen. Wuxuuna digniin ku bixiyey in shabakadda kombuyuutarrada Fransiisku khatar ku jirto, isla markaana ay suurto gal tahay in sannadkan 2017, la qaado isku dayo lagu xagal daacinayo doorashooyinka Faransiiska ee sannadkan dhici doona.
Mudane Le Drian, ayaa dusha kala socday hawl gal ballaadhan oo dib loogu habaynayo kartida internet-ka ee Faransiiska, kaas oo taliyaha ciidanka loogu dhiibayo hogaanka xarun cusub oo lagu magacaabay Cybercom.
Wuxuu hadalkan ka sheegay mar uu waraysi siinayey wargeyska Faransiiska ah ee Le Journal du Dimanche, waxaanu ku soo beegmay maalmo uun ka dib markii sirdoonka Maraykanku xaqiijiyeen in Ruushku isku dayey inuu fara-geliyo, ama uu farageliyay doorashadii madaxtinimada Maraykanka ee dhacday bishii November 2016, taas oo natiijadeeda guushu ku raacday Madaxweynaha cusub ee Maraykanka Donald Trump, balse Ruushku beeniyey inuu wax lug ah ku lahaa guusha Trumo.