Araweelo News Network
Hargeysa(ANN)-Alle ha u naxariistee Fannaanadii caanka ahayd Marxuumad Sahra Axmed Jaamac, ayaa maanta ku geeriyooday magaalada Hargeysa, iyadoo mudooyinkii u danbeeyay u jiiftay xanuun haleelay.
Marxuumad Sahra Axmed Jaamac, ayaa lagu aasay xabaalaha Bariga Hargeysa ee Rawda, waxaana ka qaybgalay Aaska marxuumada Masuuliyiin ka tirsan xukuumadda, Bahda Fanka iyo boqolaal qof ka mid ah Bulshadda Caasimada Hargeysa.
Marxuumada, ayaa ka mid ahayd Fannaaniinta ugu magaca dheer Haweenka Soomaalida ee Fanka, ayaa ahayd mid Alleh ku manaystay cod cajiib ah oo soo jiita dhegaha bulshada.
Geerida Fannaanada waxa ka hadlay Madaxweynaha Somaliland Muuse Biixi Cabdi, isagoo ka tacsiyeeyay shacbiga Somaliland, Bahda Fanka Iyo qoyskii ay ka geeriyootay.
Dhanbaalka Tacsida Madaxweynaha Somaliland, ayaa u qornayd sidan:-
“IN-NAA LILLAAHI WA IN-NAA ILAYHI RAAJICUUN
Madaxweynaha Jamhuuriyadda Somaliland, Mudane, Muuse Biixi Cabdi isagoo ku hadlaya magaciisa, ka dawladda iyo ka shacbiga Somaliland, waxa uu tacsi u dirayaa, Bahda Fanka iyo Suugaanta, waxgaradka, waayeelka, aqoonyahanka, qoyska, ehelada, qaraabada, asxaabta iyo shacbiga Somaliland ee ay ka baxday Alle ha u naxariistee Fannaanadii caanka ahayd Marxuumad Sahra Axmed Jaamac oo ku geeriyooday maanta oo ay taariikhdu tahay 04/04/2018, magaalada Hargeysa.
Madaxweynuhu waxa uu marxuumada ku sifeeyey hooyo ka baxday bahda fanka iyo suugaanta, magac iyo sumcadna ku lahayd bulshada ku hadasha afka Soomaaliga meel ay joogaanba, marxuumadu waxay fanka ku soo biirtay, 1969kii.
Madaxweynuhu waxa uu marxuumada Alle uga baryayaa inuu naxariistii janno ka waraabiyo, Bahda Fanka iyo Suugaanta, waxgaradka, waayeelka, aqoonyahanka qoyska, ehelada, qaraabada, asxaabta iyo shacbiga Somaliland ee ay ka baxdayna Samir iyo iimaan saadiqa ka siiyo.
Aamiin Aamiin Aamiin
Maxamuud Warsame Jaamac
Afhayeenka Madaxweynaha JSL