Araweelo News Network

London (ANN)- Kooxda Caalamiga ah ee Xasaradaha Adduunka ICG (International Crisis Group), ayaa ku eedeeyey dalalka Geeska Afrika inay khatar ku yihiin rajada caalamku ka qabo nabadgelyo iyo horumar ka islaaxa waddanka colaaduhu naafeeyeen ee Soomaaliya.
Warbixin ICG soo saartay toddobaadkan oo ay cinwaan uga dhigtay “Khatarta dalalka gobolka ku keeni karaan rajada bulshada Soomaalida,” waxay walaac kaga muujisay halis Madaxweynaha cusub ee Soomaaliya Mr. Maxamed Cabdillaahi Farmaajo kaga iman karta waddamada deriska la ah oo ay sheegtay inay shaki weyn ka qabaan.
“Dalalka deriska ah waxay khatar ku yihiin rajada Soomaaliya, kadib doorashadii Farmaajo,” ayaa lagu xusay warbixinta kooxda ICG.
Waxa kaloo Kooxda Caalamiga ah ee Xasaradaha Adduunka warbixintooda ku sheegeen in doorashada Madaxweyne Farmaajo fursad siinayso dalalka daneeya arrimaha Soomaaliya, “Taas oo ay nabad iyo xasillooni ugu soo celin karaan Soomaaliya iyo guud ahaan Geeska Afrika, balse weli waxa jira shaki laga qabo in Soomaaliya nabadgelyo buuxda ka hirgasho, maadaama kalsooni-darro weyn ka jirto dhanka dalalka awoodda leh ee mandaqadda.”
“Dad badan ayaa rajo wanaagsan ka muujinaya kalsoonida iyo taageerada Farmaajo haysto in ay suurogelin karto dib-u-heshiis qaran iyo weliba inuu xalliyo boogaha qotoda dheer ee laga dhaxlay dagaalladii sokeeye ee dalka ka qarxay wixii ka dambeeyey sannadkii 1991-kii,” ayaa lagu yidhi warbixinta ICG.