Araweelo News Network
Bakool(ANN)Ugu yaraan 20 qof ayaa la xaqiijiyey inay ku geeriyoodeen, tiro intaas ka badanna ku dhaawacmeen dagaallo aad u culus oo xoogagga Al-shabaab iyo ciidammada dawladda taagta daran ee Soomaaliya ku dhexmaray degaanno ka tirsan Gobolka Bakool labadii maalmood ee u dambeeyey.
Dagaallada ugu xooggan oo ka dhacay degaanka Moora-gaabey oo ku dhow degmada Xuddur ee xarunta Gobolka Bakool, ayaa la sheegay inay sababeen khasaare baahsan oo isugu jirta dhimasho iyo dhaawacyo tiro badan dhinacyada kala gaadhay.
Guddoomiyaha degmada Xuddur Mr. Maxamed Macallin oo la hadlay warbaahinta shalay, ayaa ku dooday inay ciidammada dawladda Soomaaliya kaga dhinteen dagaalladaas siddeed askari, halka uu sheegay inay Al-shabaab ka dileen 10 dagaalyahan, hubna kaga furteen.
Mr. Macallin waxa uu intaa ku daray in ciidanka maamulka Muqdisho wadaan hawlgallo uu xusay in la isugu furayo degaannada Gobolka Bakool oo intooda badan gacanta ugu jira kooxda Al-shabaab.
Dhinaca kale, Guddoomiyaha degmada Xuddur ayaa ugu baaqay dawladda federaalka Soomaaliya iyo maamul-goboleedka Koonfur-galbeed inay gacan ka geystaan dagaallo uu sheegay in xoogagga Al-shabaab lagaga saarayo degaannada gobolkaas.
