Araweelo News Network
Muqdisho (ANN)- Dagaal culus oo sababay khasaare kala duwan, ayaa ciidammada AMISOM iyo kooxda Al-shabaab ku dhexmaray Gobolka Shabeellaha Dhexe ee dalka Soomaaliya.
Dagaalka oo aan illaa hadda si buuxda loo ogeyn khasaaraha ka dhashay, ayaa ka dambeeyey kadib markii dagaalyahanno ka tirsan Al-shabaab waddada u galeen ciidammada dalka Burundi ee qaybta ka ah hawlgalka AMISOM oo marayey inta u dhexaysa tuulooyinka Biyo-cadde iyo Mir-tuugo oo hoos taga degmada Mahadaay ee Gobolka Shabeellaha Dhexe.
Dad ku sugan Mahadaay ayaa u sheegay idaacadda BBC-da inuu dagaal in ka badan saacad socday ku dhexmaray degaankaas ciidanka AMISOM iyo xoogagga Al-shabaab, isla markaana labada dhinac isu adeegsadeen hubka culus.
Ciidan gurmad ah oo ka tirsan kuwa maamulka taagta daran ee Muqdisho oo ka baxay magaalada Jowhar, ayaa gaadhay aaggaas oo dagaal xooggan ka socday tan iyo duhurnimadii shalay.
Wararkii ugu dambeeyey ayaa tibaaxay in dagaalku istaagay kadib markii dagaalyannada Al-shabaab ee weerarka ku qaaday ciidammada Burundi dib loo riixay.
Tuulooyinka Biyo-cadde iyo Mir-tuugo ee dagaalka qadhaadh ka dhacay waxa ay qiyaastii 47km dhanka bari ka xigaan magaalada Jowhar ee xarunta Gobolka Shabeellaha Dhexe.