Hargeysa (ANN)-Ciidanka Dab-damiska Iyo Khataraha kale ka Badbaadiya Bulshada Somaliland, ayaa ku guulaystay inay damiyaan Meherad ay lahaayeen dad ajaanib ah oo Dab qabsaday maanta.
Meheradaaoo ku taalay Xaafada Jigjiga-yar ee Woqooyi galbeed Magaalada Hargeysa, ayaa lagu iibinayay Roodhida iyo Macmacaanka, waxaana lahaa ganacsato u dhalatay dalka Yemen.
Sida lagu sheegay qoraal kooban oo kasoo baxay xafiiska warbaahinta Ciidanka Dab-demiska Iyo Khataraha kale ka Badbaadiya Bulshada Somaliland oo nuqul ka mid ah soo gaadhay shebekadda Araweelo News Network, ayaa lagu sheegay in Ciidanka oo gurmad deg-deg ah sameeyay ay ku guuleysteen inay dabkaa ka xakameeyaan kuna hakiyaan halkii uu ka bilaabmay oo ahayd goobta lagu kariyo cuntada ee Meheradaa.
Qoraalka, ayaa lagu sheegay in dabkaas aanu sababin khasaare dhimasho iyo dhaawac toona, waxaana ciidamada Dab-demisku sheegen in ay badbaadiyeen hanti aad u badan oo dhex taallay meheradaa ganacsatada reer Yemen.
Waxayna xuseen Ciidanka Dab-damisku in hawlgalka ay u soo gurmadeen Ciidamadda Dab-demiska ee Taliska guud iyo Saldhiga Ciidanka ee Degmada Ibraahim Koodbuur ee Magaalada Hargeysa.
Qoraalka ayaa lagu sheegay in sababta dabka dhalisay aan si cad loo ogayn, isla markaana ilaa hadda gacanta lagu hayo baadhisteeda, sidoo kale Maamulka Degmada ayaa iyaguna dhankooda kala shaqeeyay ciidanka daminta dabkan, sida lagu xusay qoraalka kasoo baxay Xafiiska Warbaahinta Ciidanka Dab-demiska Iyo Khataraha kale ka Badbaadiya Bulshada Somaliland.
AKhri: Somaliland Oo Heeggan Buuxa La Geliyay Ciidanka Dabka Iyo Khataraha Kale Ka Badbaadiya Bulshada