Boosaaso (ANN)- Dagaalyahannada kooxda ISIS/Daacish, ayaa gawracay askar ka tirsanaa ciidanka maamul-goboleedka Soomaaliya ee Puntland oo ay ka qafaasheen duleedka magaalada Qandala dabayaaqadii bishii hore.
Kooxda Daacish ayaa meydadka saddex askari oo ay gawraceen soo dhigay jidka dheer ee magaalooyinka Qandala iyo Bosaaso ee xeebta maamulka Puntland subaxnimadii hore.
Askartan ayaa ku jiray dad dhowaan Daacish ka afduubteen meel ku dhow degaanka Qandala xilli ay ku soo jeedeen magaalada Boosaaso, waxana adag in xog dhammaystiran laga helo sababaha keenay in kooxdaasi bireeyaan.
Dadka degaankaas ayaa saxaafadda u sheegay in saddexda askari ee iyagoo gawracan meydadkooda laamida soo dhigay qayb ka ahaayeen ciidan maamulka Puntland u diray dhowaan degmada Qandala si ay uga xoreeyeen kooxda Daacish oo muddo bil ah maamulaysay magaaladaas.
“Meydadka saddexda askari ee la gawracay waxa la soo dhigay degaanka Karin oo u dhexeeya Qandala iyo Boosaaso, dadka shacabka ahna weli wejiyadooda ma aqoonsan, balse waxay ku lebbisnaayeen dharka ciidanka Puntland.” Sidaa waxa yidhi goob-jooge lagu magacaabo Saxane Jaamac oo ku sugan tuulada Karin.
Waxa uu intaa ku daray, inay dadka degaannadaas la soo daristay cabsi xooggan ka dhalatay gawraca askarta iyo in kooxda Daacish qaaddo tallaabooyin kale oo dhan ah cid kasta oo xidhiidh la leh maamul-goboleedka Puntland.
Masuuliyiinta maamulka Puntland oo wax laga weydiiyey dhacdadaas naxdinta leh, ayaa ka gaabsaday inay ka hadlaan dilka askartooda la gawracay, laakiin waxay sheegeen inay ciidammo u direen degaanka la dhigay meydadka saddexda askari.
Dhinaca kale, dagaalyahannada kooxda Daacish ayaa weli gacanta ku haya tiro kale oo ka tirsan ciidammada Puntland, kuwaasoo ku jiray 13 qof oo ay dhowaaqan ka qafaasheen duleedka magaalada Qandala ee xeebta Gobolka Bari.