Araweelo News Network
Dadka ajnebiga ah ee ciidammada Kenya xabsiga u taxaabeen waxay isugu jiraan 9 dumar ah, 32 rag ah oo 22 ka mid ah u dhasheen dalka Shiinaha, halka 19 kalena ka soo jeedaan waddanka Taiwan.
Agaasimaha Waaxda Dambi-baadhista Kenya Mr. Ndegwa Muhoro oo horkacayey saraakiil sare oo ka tirsan laamaha ammaanka ee dalkaas, ayaa hawlgal ay ku fuliyeen ku qabtay dhowr aaladood nooca isgaadhsiinta ah oo ay ku jireen 14 kombiyuuttada gacanta lagu qaato (laptop), siddeed moobil iyo qalabka oo muhiim ah oo yaallay guriga dadkaasi deggaanaayeen.
Sidoo kale, Muhoro ayaa sheegay inay baacsanayaan milkiilaha gurigaas iyo ruux Kenyan ah oo dadkaas waddanka soo galiyey.
Muwaaddiniinta shisheeye ayaa sida ku cad baasaboorrada ay siteen waxay haystaan muddo 3 bilood ah ay booqasho ku joogayaan Kenya, waxana haatan la baadhayaa wixii ay damacsanaayeen.
Ajnebiga la xidh-xidhay ayaa la sheegay in qofkii ugu horreeyey dalka Kenya galay 18-kii bishii February ee sannadkan 2016, halka uu kii ugu dambeeyeyna tegay 1dii bishan April.
Booliska ayaa sheegay in macluumaadka ku saabsan arrimaha ajnebiga ay xidheen u soo gudbiyeen bulshada ku dhaqan xaafadda Runda oo ka shakiyey dhaqdhaqaaqa dadka la tuhunsan yahay.
Sida lagu sheegay baadhitaanno horudhac ah oo demb-baadhayaasha Kenya soo saaareen, eedeysanayaasha ayaa aasaasayay xarun talis ah oo laga hago isgaadhsiinta, taasoo la doonayey in lagu xidho mid ka mid ah qolalka guriga ay degganaayeen si ay qorshahooda uga fuliyaan.
Baadhayaal ka socda ciidammada waaxda CID-da ee qaabilsan tignooliyadda iyo kombuyuutarrada, ayaa gacanta ku haya baadhista kiiska loo haysto ajnebiga loo xidh-xidhay tuhunnada la xidhiidha ammaanka.
Xarun weyn oo talis isgaadhsiin ah oo carqaladeyneysay nidaamka isgaadhsiineed dalka Kenya oo dhan ayaa lagu qabtay xaafadda Runda ee caasimadda Nairobi sannadkii 2014.
