Araweelo News Network
London(ANN)- Dowladda Ingiriiska ayaa ka sheegtay in hoos u dhac dhaqaale soo waajahay tan iyo markii ay iskaga baxday Ururka Midowga Yurub. Sidaa awgeed ay ka Fiirsanayso dhaqaalaha ay ku bixiso dagaalka lagula jiro xarakada ka dagaalanta Soomaaliya ee Al-shabaab.
Mr. Boris Johnson oo ah wasiirka arrimaha dibadda ee Britain oo ka hadlayay magaalada Kampala ee dalka Uganda, ayaa sheegay in dowladdiisu aanay awoodin sii wadidda dhaqaalaha ay siiso ciidamada AMISOM ee ku sugan Soomaaliya, kuwaas oo dagaal kula jira Al-shabaab.
“Britain waxa ay ka fiirsanaysaa dhaqaalaha ay ku taageerto howlgalka Nabad ilaalinta Somalia” ayuu yidhi, Boris Johnson oo kulan gaar ah laqaatay Madaxweynaha Uganda xili uu booqasho ku maryay.
Dhinaca kale Shir loo qorsheeyay in Bisha May,2017 lagu qabto magaalada London oo la doonayo in lagaga hadlo arrimaha Soomaaliya ayaa la filayaa in Ururka Midowga Afrika uu kusoo bandhigo caqabadaha dhanka dhaqaalaha ah ee ka heysta hawlgalka dhinaca nabad ilaalinta ee Soomaaliya.
Arrintan ayaa kusoo beegantay kadib markii Madaxa AMISOM dhowaan sheegeen in marka la gaadho horaanta 2018, ay bilaabi doonaan in ciidamadooda ay kala baxaan dalka Soomaaliya, taas oo ay sabab u dhigeen arrimo la xidhiidha dhinaca dhaqaalaha.