Araweelo News Network
Dad goob joogayaal ah oo ka dhowaa degaanka qaraxu ka dhacay, ayaa sheegay in qaraxu uu burburiyay gaadhi kuwa Ciidamada Puntland ah, iyadoo ciidankii saarnaa khasaare dhimasho iyo dhaawac soo gaadhay.
sida ay sheegayaan wararka qaraxa ayaa ahaa miino dhulka lagu aasay, taas oo haleeshay gaadhi nooca dagaalka ah oo ay wateen ciidamada Daraawiishta Puntland.
wararka ayaa intaa ku daraya in Daqiiqado kadib qarax kale haleelay ciidamo usoo gurmaday goobta qaraxu ka dhacay iyagoo dhaawacyo qaadayay xilligaasi dhimashada gaadhay ciidanka Puntland ayaa lagu qiyaasay in ka badan 16 Askari, balse maamulka Puntland ayaan wax war ah kasoo saarin qaraxyada lala beegsaday ciidankooda.
Dhinaca kale War rasmi ah oo kasoo baxay xarakada Shabaab ayaa lagu sheegay in 17 askari ay ku dishay qaraxyada is xig-xigay ee ka dhacay Deegaanka Galgala, war lagasii daayay Idaacadda Andalus ee Afka xarakada ku hadasha ayaa lagu sheegay in Mujaahidiintu howlgal guulaystay ka fuliyeen deegaanka Galgala
Warar kale oo ka imanaya dhinaca Magaalada Boosaaso, ayaa sheegaya in gaadiidka caafimaadka Ambalaasta uu gaadhay goobta qaraxyadu ka dhaceen iyagoo dhimasho iyo dhaawac u daabulay dhanka magaalada Boosaaso.
Cisbitaalka Guud ee magaalada Boosaaso ayaa la geeyay Meydadka 17 askari iyo dhaawacyo waxaana Cisbitaalka gaadhay saraakiil ka tirsan ciidanka Daraawiishta Puntland.
Deegaanka Galgala, ayaa marar baddan waxa weerraro iskaga horyimaada Al-shabaabta ku sugan Buuraleyda Galgala iyo Ciidamada Puntland, waxaana horaantii bishan ka dhacay qaraxyo sidan oo kale ah oo khasaare dhaliyay, kuwaas oo Al Shabaab ay sheegtay.