Araweelo News Network
Mogadishu(ANN)-Fadhi ay yeesheen xubnaha cusub ee Baarlamaanka Dawladda Federaalka ah ee Soomaaliya, ayaa goordhowayd lasoo gaba gabeeyay, kaddib tartan loo galay shirgudoonka Baarlamaanka cusub oo loolan adag ka dhashay.
Cismaan Cilmi Boqorre ayaa ku dhawaaqay in Cismaan Jawaari oo ahaa Guddoomiyihii hore ee Baarlamaanka uu markale uu ku guuleystay doorashadii maanta dhacday wuxuuna ka adkaaday dhammaan musharixiintii la tartamaysay.
Guddoomiyaha Baarlamaankii hore Xildhibaan Jawaari, ayaa taageero xooggan ka helay xildhibaanada ay soo xusheen maamullada Puntland,Hirshabelle,Jubbaland iyo Galmudug,wuxuuna ku guulaystay inuu helo 159 cod halka Cabdi Rashiid Xidig oo la tartamayay uu helay 97 cod, iyadoo 290 xildhibaan kasoo xaadireen fadhigaa.
Doorashada, ayaa sababtay in Ammaanka magaalada Muqdisho maanta aad loo adkeeyo, waxaana la filayaa in beri ay dhacdo doorashada guddoomiye ku xigeenka koowaad iyo labaad ee baarlamaanka.
Kooxda Damul Jadiid, ayaa ka shaqeeyay in aan wax isbedel ah ku imaan hoggaanka Baarlamaanka DF-ka si uu liiska musharixiinta xilka madaxweynaha uu uga saaro Shariif Sakiin, waxayna guusha Jawaari saadaal u tahay in Madaxweyne Xasan Sheekh kusoo laabanayo kursiga, maadaama aanu ninka looga baqayay ee Shariif aanu awood ku lahayn Baarlamaanka cusub.
Tartankii sanaddii 2012 doorashadii dhacday, ayaa sababtay in Shariif Sheekh Axmed uu siyaasadda soo geliyay Jawaari si uu gacan uga geysto in Shariif kursiga kusoo laabto, balse waxba kuma soo kordhin, waxaana doorashadii xilligaas lagaga adkaaday shariifka, iyadoo uu ka guuleystay Xasan Sheekh.