Mogadishu(ANN)Baarlamaanka Somalia, ayaa meel mariyay qorshe heshiis dhinaca Milateriga ah oo dhexmaray Dawlada Somalia iyo Dawlada Talyaaniga, kaas oo sheegaya in Dawlada Talyaanigu ka caawinayso Dawlada taagta daran ee Somalia dhinaca Milateriga.
Guddoomiyaha Baarlamaanka Somalia Cabdiraxmaan Maxamed Cismaan Jawaari oo guddoominayay kulankaa oo ahaa Kalfadhigii Shanaad oo ka dhacay maanta dhismaha Baarlamaanka, ayaa sheegay in ay kasoo xaadireen 156 Mudane, kuwaas cod loo weydiiyay golaha heshiiskaa oo ay wada saxeexdeen Wasiirada Gaashandhigga ee labada dal ee Soomaaliya iyo Talyaaniga, isla markaana ku saabsan Iskaashi dhinac Milatari ah oo dhex mara labada Dowladood.
Mudane Maxamed Sheekh Cismaan Jawaari oo ka hadlaya natiijada codbixinta mudanayaasha ee heshiiska dhinaca Milateriga ee dhexmaray labada dal, wuxuu yidhi, “134 mudane ayaa ogolaatay, meel marinta heshiiskaa, saddex mudane ayaa diiday, waxaana ka aamusay shan mudane. Sidaa ayuuna ku ansaxay, waxaana la ansixiyay heshiiskaa markii ay golaha warbixin la xidhiidha ka dhegeysteen guddiga Difaaca ee Baarlamaanka”
Dhinaca kale Baarlamaanka Somalia, ayaa si kulul u canbaareeyay qoraal Wakiilka Qaramada Midoobay ee Somalia Nicholas Key kaga hadlay khilaafka Madaxda Dawlada Somalia ee u dhexeeya Madaxweynaha iyo raysal Waasaaraha Somali, waxayna ku tilmaameen qoraalkaa mid meel ka dhac ku ah qaranimada iyo madaxbanaanida Somalia.
Qoraalkaa oo sidoo kale ka cadhaysiiyay Madaxweynaha Somalia Xasan Sheekh iyo xubnaha Baarlamaanka, ayaa u muuqday si cad daaha uga fayday awooda Xafiiska oo meesha ka saaraya jiritaanka Qaranimada Somalia, isagoo taa bedelkeeda u muujiyay meel maxmiyad u ah qaramada midoobay ee Somalia.
Araweelo News Network
Somaliland Office
ifo@araweelonews.com
ifo@araweelonews.com
jaamac132@gmail.com