Araweelo News Network
Mahadaay – Soomaaliya (ANN)- Kooxda Al shabaab ayaa sheegtay inay 7 askari oo ka tirsanaa ciidammada dalka Burundi ee qaybta ka ah hawlgalka AMISOM ku dileen duleedka degmada Mahadaay ee Gobolka Shabeelaha Dhexe, koonfurta waddanka Soomaaliya toddobaadkan.
War Al-shabaab ku baahiyeen warbaahinta internetka ee taageera shalay, ayaa lagu sheegay inay weerar gaadmo ah oo dagaalyahannadoodu ku qaadeen kolonyo gaadiid ciidammada Burundi wateen oo ka baxay tuulo lagu magacaabo Biyo-cadde, kuna sii jeeday degaanka Jahweyn oo qiyaastii 8km u jira degmada Mahadaay kaga dileen toddoba askari, tiro kalena ka dhaawaceen maalintii Jimcaha.
Dhinaca kale, weerar madaxbannaan oo laga helay dadka degaankaas ayaa xaqiijiyey inuu weerarka ciidanka Burundi lagu qaaday ku bilowday qarax loo adeegsaday miino waddada qarkeeda lagu aasay, kadibna dagaal muddo hal saac ah socday halkaas ku dhexmaray ciidammada AMISOM iyo xoogaga Al-shabaab.
Hase yeeshee, taliska hawlgalka ciidammada AMISOM ee Soomaaliya, ayaa beeniyey sheegashada Al-shaabab oo ay ku tilmaameen been-abuur cad, isla markaana aanay jirin askar ka tirsanaa ciidankooda oo kooxdaasi jid-gooyo ku dileen.
