Araweelo News Network
Muqdisho(ANN)-Madaxweynaha cusub ee Soomaaliya, Maxamed Cabdullahi Farmaajo, ayaa si rasmi ah ugu wareegay guriga Madaxtooyadda Villa Soomaaliya.
Xafladda ay kula kala wareen labada masuul xarunta Villa Soomaaliya maanta, waxaa lagu casuumiyay warbaahinta qeybaheedda kale duwan, waxaana astaanta calanka ka tumay ciidanka bambeyda Soomaaliya.
Madaxweynihii hore, Xasan Sheekh Maxamuud, ayaa markii uu wareejiyay xafiiska u guuray meel loo qorsheeyay gudaha magaalada Muqdisho.
Madaxweyne Farmaajo oo tan iyo markii la doortay deganaa hoteelka Jasiira ee magaalada Muqdisho, ayaa la filayaa inuu hawshiisa billaabo wixii hada ka danbeeya.
Balse Xafladda rasmiga ah ee caleema saarka ayaa Muqdisho ka dhici doonta 22-ka bisha, taas oo la filayo in ay kasoo qeyb galaan marti sharaf gobolka iyo caalamkaba ka socda.
Mudadii ay socotay xaflada xil wareejintu, waxaa la maqlayay maddaafiic lala beegsaday Villa Soomaaliya, kuwaas sida warrarku ay sheegeen ku dhacay meel ku dhow Madaxtooyadda.
Maddaafiicdaa oo sababay ugu yaraan sida ay warrarku sheegayaan in seddax qof ay ku dhaawacmeen.
Xarakada Al-shabaab, oo maalmahan hakiyay weerraradii ay ka fulinayeen Muqdisho, wixii ka danbeeyay doorashadii lagu doortay Madaxweyne Farmaajo, ayaa sheegatay Maddaafiicdaa lala beegsaday Villa Soomaaliya xilligii ay socotay xil wareejintu.
Maddaafiicda Al-shaabab maanta la beegsadeen Madaxtooyadda Villa Soomaaliya, ayaa u muuqday fariin ay ku saggootinayeen Madaxweynihii hore ee Soomaaliya Xasan Sheekh, isla markaana kusoo dhowaynayaan Madaxweynaha cusub ee xilka la wareegay Maxamed Cabdullaahi Farmaajo.
Maalmaha soo socda, ayaa la filayaa inuu Madaxweyne Farmaajo billaabo qorshihiisa hannaanka sidii u magcaabi lahaa Ra’iisal Wasaarahii soo dhisi lahaa xukuumadda.
