Araweelo News Network
Muqdisho (ANN)- Kooxda Al-shabaab, ayaa laba nin oo lagu eedeeyey tuugo gacmaha kaga jaray fagaare ku yaal degaanka Kuntuwaarray oo ka tirsan Gobolka Shabeellaha Hoose ee dalka Soomaaliya.
Labada nin oo magacyadooda lagu sheegay Cabdulqaadir Maadeey Roobow iyo Maadeey Eenow, waxa fagaare dad badan daawanayeen mid kasta lagaga jaray gacanta midig, kadib markii maxkamad Al-shabaab leedahay ku ridday xukun ah inay xadeen dukaan ku yaal degaanka Kunturwaarray oo ay maamulaan.
Ragga lagu fuliyey xukunka gacan go’aynta ah oo da’doodu tahay 20 jir, ayaa Maxkamadda Al-shabaab ku eedaysay inay inay lacag iyo teleefanno xadeen dukaankaas, kadibna waxay ku xukuntay in mid kasta gacanta midig la gooyo.
Kooxda Al-shabaab ayaa marar hore sidan oo kale dhowr qof oo lagu eedeeyey xatooyo gacmaha ugu gooyey degaannada ay ka taliyaan ee koofurta Soomaaliya.